بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی چاویکەوت بە ئێریک شۆڤالیێ، باڵیۆزی فەڕەنسا لە عیراق.

لە دیدارێکدا کە دەرباز کۆسرەت رەسوڵ، کارگێڕی مەکتەبی سیاسی و ئۆلیڤیێ دیکوتینێ، کونسوڵی گشتی فەڕەنسا لە ھەرێمی کوردستان ئامادەبوون، دۆخی سیاسیی هەرێم و عیراق تاوتوێکرا و بەردەوامی گفتوگۆکان لەپێناو چارەسەرکردنی کێشەکانی حکومەتی هەرێم و عیراق لەسەر بنەمای دەستوور و پاراستنی بەرژەوەندییە گشتییەکان جەختیلێکرایەوە.

سەرۆک بافڵ جەلال تاڵەبانی روانینی یەکێتی لەبارەی دۆخی هەرێم و هەنگاوەکان بۆ تێپەڕاندنی ناکۆکییەکان روونکردەوە و رایگەیاند، بۆ هەمووان ئاشکرایە ئێمە باوەڕی نەگۆڕمان بە کاری پێکەوەییە. ژیان و گوزەرانی خەڵک بەرپرسیارێتیی ئێمەیە و هەموو هەوڵێک لەو پێناوەدا دەدەین.