بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا پێشوازیکرد لە جێنین پلاسخارت، نوێنەری تایبەتی سکرتێری گشتیی نەتەوە یەکگرتووەکان لە عیراق.
لەكۆبوونەوەكەدا دوایین گۆڕانكارییە سیاسییەكان، كێشە ناوخۆییەكانی هەرێمی كوردستان و هەڵبژاردن، ناكۆكییەكانی نێوان هەولێرو بەغدا گفتوگۆیان لەبارەوەكراو جەخت لەكۆتاییهێنان بەگرژییەكان و دەستپێكی قۆناغێكی نوێی سیاسی كرایەوە.
پرسی هەڵبژاردن لەهەرێمی كوردستان و بۆچوونی لایەنە سیاسییەكان سەبارەت بەپرۆسەكە یەكێكبوو لەتەوەرەكانی كۆبوونەوەكەو سەرۆك بافڵ وتی: ئێمەو زۆرینەی لایەنە سیاسییەكانی تریش لەگەڵ ئەنجامدانی هەڵبژاردنێكی بێگەردین لەوادەی خۆیدا، بەڵام دەبێت یاسای هەڵبژاردن هەموار بكرێتەوە، تۆماری دەنگدەران پاكبكرێتەوەو پێکهاتەکان نوێنەرایەتی خۆیان هەڵبژێرن و وەک کارتی فشار بەکارنەهێنرێن. جێبەجێکردنی ئەو خاڵانەش پەیوەستە بە بەڕێوەچوونی هەڵبژاردنێکی بێگەردەوە لەوادەی دیداریکراوی خۆیدا.
لەدیدارەکەدا بافڵ جەلال تاڵەبانی جەختی لەپشتیوانی هەوڵە نیشتمانییەكان كردەوە لەپێناو سەرخستنی حكومەتی نوێ و جێبەجێكردنی بەرنامەكانی لەپێناو پێشكەشكردنی خزمەتگوزاری و بەهێزكردنی پایەكانی دەوڵەتداری.