ساڵڕۆژی شەهیدی یەكێتی، ئاكارە یان یادگارە؟
مەلا بەختیار: رۆژی شەهیدی یەكێتی تەنها یاد نییە، بەڵكو ئەركە

  2021-11-21 20:58      124 جار بینراوە        کۆمێنت

٤٥ ساڵ لەمەوبەر، وەكو روداوەكانی ئەمڕۆ، وردەكاریم لەبیرە، شەوی ( 20-21/11/1976) چۆن بروسكەی بەڕێوەبەری ئاسایشی سلێمانی گەیشتە شێخ جەناب، بۆ دوا دیدار، سەردانی شیهابی برای بكات، هەر ئەو شەوە، بەشێكی شار لەناخەوە بەرگی رەشی پۆشی. نیوەڕۆكەی كە تەرمی شەهید شیهاب گەیشت، ماتەمینی سلێمانی داگرتبوو. ئەو رۆژەو شەوەكەشی لەمزگەوتی بن تەبەق هێشتمانەوە. هەتا بەیانی كەمال مەزهەرو روشدی و فاروق مەلا مستەفاو خزمانی شەهید ئارام و شیهاب و دەیان هاوڕێی كۆمەڵە ئێشكی تەرمەكەمان دەگرت، دلێری سەید مەجیدو لەتیف شێخ عومەرو بەندە سەرپەرشتیمان دەكرد. شەوێكی هەتا بڵێی سامناك و دەردەناك بوو. مەفەرزەی پاراستنی تەرمەكەو تاڕادەیەك ئاگادارییان لەبەندە، سپێردرایە شەهید (یاسین رەش) ئەم مەفرەزەیەش، تا بەیانی پڵنگ ئاسا، ئاگایان لێمان بوو. دوو دەمانچەو نارنجۆكێكیان پێ‌بوو. تا بەیانی كەسمان نەخەوتین. بەیانییەكەی شكۆمەندانە، كەژاوەی تەرمی شیهاب برایە گردی سەیوان. بیستمان لە كۆیەش، خەڵكەكە، بێ‌ سڵەمینەوە، تەرمی شەهید جەعفەریان بەدەم سروودەوە سپاردبووە خاك. خالید دلێر بەدەستی خۆی خستبوویە گۆڕی نەمری. تەنها شەهید ئەنوەر بێ‌ نازو بێ‌ كەس، نێژرابوو. كەركوك لەدۆخێكدا بوو، نەدەكرا، وەكو سلێمانی و كۆیە، مەراسیم بۆ تەرمی ئەنوەر زۆراب بكرێ‌. هەندێكیش لەهاوڕێ و كەسوكاری، خۆپارێز بوون!
سەرەڕای ئەوەی دەكرا شیهاب و هاوڕێكانی نەكەونە داوی رژێمی شای ئێران و رادەستی عیراق نەكرێن، بەڵام شیهاب، بەڕاستی رابەرێكی چەپی كەم هاوتا بوو. ئەگەر نەیتوانیبێ‌ لەخەباتی خۆشاردنەوەو شاخدا، ببێتە سومبولی چەپەكان، بەڵام لەدامەزراندنی كۆمەڵەو زینداندا، نەك سمبولی رابەرێكی بێ‌ وینەبوو، بەڵكو بەكاریگەری خۆی توانی زۆرێك لەهاوڕێیانی كۆمەڵە لەهەرەسی دەروونیی-جەستەیی بپارێزی و چەندین كەسیشی لەكەوتنە داوای جەلادەكان پاشگەز كردبوەووە، بەئەندامانی حزبی شیوعیشەوە. بڕیاری لەسێدارە دان و جێ‌بەجێكردنیشی ترسێكی گەورەی رژێم بوو، لەم كەڵە رابەرە ، كە بە هەق شەهید جەعفەریش هاوتای شەهید شیهاب بوو، لەخۆڕاگری و بەرزیی ورەو دەم بەبپێكەنین، رووەو پیری مەرگ، هەروەها ئەنوەر زۆرابیش.
پێشم وایە، كۆمەڵە، دوای داستانی شەهیدكردنی شیهاب و هاوڕێكانی، هاوزەمانی بەرپابوونی شۆڕشی نوێ‌ ( كە هەبوون دژی بەرپاكردنەكەی بوون بەپاساوی لەرزۆك لەرزۆك ) هەردوو رووداوەكە كۆمەڵەو یەكێتی و شۆڕشی نوێیان، لەو زەمان و زەمینەدا، بردە قۆناغی باڵای متمانەی جەماوەرو قوڵكردنی گیانی شۆڕشگێڕانە. بۆیە، نەك رۆژی شەهیدكردنی شیهاب و هاوڕێكانی، كە كراوەتە رۆژی شەهیدی یەكێتی، شایەنیانە، بەڵكو هێشتا داستانی شیهاب و هاوڕێ‌ زیندانەكانی زۆر زۆریان بەبەرەوە ماوە، بۆ مێژوو تۆماربكرێن. 
هەڵوەشاندنەوەی كۆمەڵە، جەزرەبەیەكی كوشندە بوو، لەبزاڤی چەپ و دیموكراسی درا. كاریگەرە نالەبارەكانی هەتا دێت دەردەكەوێ. دۆخی گەندەڵی و هەلپەرستی ناو یەكێتی، هۆكارە سەرەكییەكەی دەگەڕێتەوە بۆ نەمانی پەیوەندی حیزبایەتی و رێبازی دادپەروەری و مۆراڵی چەپگەرایی، كەلە كۆمەڵە رابەرایەتی دەكرد.
لەكۆتاییشدا دەڵێین: رۆژی شەهیدی یەكێتی، كە رۆژی شیهاب و هاوڕێكانێتی، تەنها یاد نییە.. بەڵكو ئەركە. بەڵێ‌..
ئەركە بۆ گۆڕینی ئەم دۆخە خراپەی یەكێتی خراوەتە ناو بازنەیەكی داخراو، بازنەكە متمانە لاوازو جەماوەر بێزار دەكات. هەر تێكۆشەرێكیش دەركی ئەركی دەربازكردی یەكێتی لەناو ئەو بازنە داخراوە بكات.. خاوەن كەرامەتی سیاسییە. ئەوەی دەركیشی پێنەكات.. با خوێنەر پێناسەی بكات!!

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو