Bi armanca zêdetir pêşxistina karê bihevreyî û hevxebata nêvbera partî û aliyên siyasî di proseya siyasî a Herêma Kurdistanê de; îro (02-03-2023), li Silêmanî, endamê Desteya Kargêrî a Polîtburoya Yekîtiya Niştimaniya Kurdistanê (YNK) Rizgar Elî, berpirsê Ofîsa Peywendiyan Emîn Babe Şêx û berpirsê dosyeya peywendiyên Kurdistanî Salar Serhed, pêşwazî li wefdekî hevbeş a pênc partiyên Kurdistanî kirin ku ji Sekreterê Partiya Neteweyî a Kurdistanê Cebar Mîrza, Sekreterê Tevgera Çaksazî a Niştimanî Bîrun  Omer Fetah, Seroka Partiya Kesk a Kurdistanê Milko Faris (Milko Baziyanî), Serokê Partiya Pêşkevtinxwaza Demokratîk a Kurdistanê Ebdulqadir Hemîd (Qadir Şiwanî) û Sekreterê Tevgera Aştîxwazên Kurdistanê Şêx Elî pêk hatibû.  
Di civînê de wefda pênc partiyên Kurdistanî; serxistina proseya siyasî û durustkirina atmosferekî guncaw ji bo hilbijartinekî zelal ku pişta xwe bide yasaya hilbijartinan ya sererastkirî û Komisyona Serbixwe a Hilbijartinan, paqijkirina lîsta dengderan, bigerxistina karîna nêvbera aliyên siyasî, berdewambûna peywendiyên dostane yên nêvbera aliyên siyasî ji bo yekgirtina nêv mala Kurd giranbuha nirxandin û di vê çarçoveyê de destpêşxeriya YNKê erênî nirxand in. 
Pênc aliyên siyasî dan zanîn ku di hemû qonaxên karê siyasî de li ser mijarên niştimanî xwe bi hevxebat û piştivanê siyasî yê rast û durust yê Yekîtiya Niştimaniya Kurdistanê zanîne. 
Di civînê de wefda YNKê helwestê pênc partiyên siyasî yên Kurdistanî hêja zanî û teqez  li ser wê yekê kir ku siyaseta destegul di proseya siyasî û hikumraniyê de baweriya neguher ya YNKê ye û herdem dê rijdiyê li ser bikin.
Di dawiya civînê de biryar hate dayîn, bi armanca baştirkirina jiyan û debara hemwelatiyên Kurdistanê û rastkirina rêreva hikumranî û hevpariyê di birêvebirinê de berdewamiya civînên bi vî awayî hebe.
Puknow
MMS