17 sal beriya niha dîroka İraqê werçerxanek mezin jiya ku Mam Celal wek yekem Kurd ji aliyê Parlemantoya İraqê ve bi serokkomar hat hilbijartin. 
Mam bi bê cûdahiya bîr û raya siyasî, olî û neteweyî, bû serokê hemû İraqiyan.
Di vê bîranînê de divê bê gotin, di dema serokatiya Serok Mam Celal de hemû pirsgirêk nehatibin çareserkirin, lê herdem zimanê gotubêj û lihevtêgîhîştin di nêv aliyan de hebû. Bi wê yekê jî cûrek ji dilniyayî û îstîkrar tenê ne ligel İraqiyan çespandibû, herwiha welatên cîran, Rojhilata Navîn û Cîhanê jî hêviyên xwe li ser giranî û pêgeha wî hunandibûn ku serokekî nû wek Mam Celal jiber peywendiyên berfireh yên dîplomasî û civakî, karîbû hevsengiyekî wiha rabigre ku di nêv İraqiyan de nasnavê “sîvana berhevker” pê hatibû bexşîn. 
Di dema serokatiya Serok Mam Celal de İraq berbi serpîketin û avadaniyê ve pêngav diavêt; lê, mixabin malavayî û koça ebedî ya Mam ew hêvî nehişt, İraq û Rojhilata Navîn derbazî qonaxekî pir ji aloziyên siyasî, neteweyî û mezhebî bû. 
Îro ku em vê bîranînê bibîr tînin, İraq ji rewşek siyasî ya nexwastî re derbaz dibe û jiber nebûna diyalogekî niştimanî ji bo çareserkirina arîşeyan, nîşaneya wê yekê ye ku niha ji hemû deman zêdetir pêwîstiya me bi wê siyaseta hekîmane ya Serok Mam Celal e; da ku giyanê tebayî û bihevrejiyanê li İraq û Kurdistanê zindî bikin, welat û Rojhilata Navîn ji kûrkirina arîşeyên siyasî û yen din dûr bigrin û aramiya zêdetir ji bo gelên İraq û Herêma Kurdistanê pêk bînin. 
                                                                                                                     Polîtburoya 
                                                                                                     Yekîtiya Niştimaniya Kurdistan
                                                                                                                      06-04-2022
Puknow
MMS