ئەگەر بۆ مرۆڤایەتی بەگشتی و وڵاتانی دراوسێمان بەتایبەتی هاتنی کۆڕۆنا شۆکێکی گەورەو بڕێکی زۆر لەترس و نیگەرانی لەگەڵ خۆیدا هێنابێت، رەنگە بۆ ئێمە ئەو ترس وئەو بڕە لەشۆکە جۆرو مانایەکی تری هەبێت، جیاواز لەتەواوی ئەو مانایانەی کە مرۆڤایەتی و دەوڵەتەکانی ئەو دیو جوگرافیای کوردستان هەیانە،راستە لەباری زانستی و دونیایی تەندروستییەوە ئەشێێ هەڵگری یەک مانا و یەکجۆر لەهەوڵ بێت بۆ تێپەڕاندنی و هەرئەمەش خاڵی هاوبەشی ئێستایی نێوانمان بێت، بەبێ ئەوەی سنوور یان دین یان کەلتوور پانتاییەکی بۆ مابێتەوە رۆڵێک بۆ نێوەندگیری یان تەرەفگیری ببینێت وەک ئەوەی بۆ کۆی کایەکانی تر هەیەتی، هەروەک چۆن حەکیم و دکتۆرەکانی دنیای پێشکەوتوو لەئاست بچووکیی ئەم ڤایرۆسە وەک قەبارەو گەورەیی لەمەترسییەکەیدا کڵۆڵن حەکیمەکانی ئێمەش هەروان.
بەڵام ئەوەی کرۆک و مەبەستی ئەم نوسینەی منە، نیشاندانی دیوێکی تری کۆرۆنایە، دیوێک کە دەگونجێت ببێت بەسەرەتایەکی تازەو داهاتووی وڵاتێکی خاوەن یاساو فەرمانڕەواییەکی تەواو عەقڵانی لەسەر بینابکرێت، ئەوەی وەک جیاوازییەکی بنەڕەتی ئێمە لەکۆی مرۆڤایەتی جیادەکاتەوە، ئەوەیە کەئێمە هەموو کەمتر لەبیست ساڵێک قەدەر بەڕووداوێکی بێ ئەنداز دڕندەو مەترسیدار ئاشنامان دەکات، هەر رووداوێکی بەسە بۆ ئەوەی چ وەک نەتەوە یان وەک نیشتمان لەبەردەم سڕینەوە یان لێکترازانێکی قوڵدابین، جارێک شاڵاوی بەعس و ئەنفال وکیمیایی و جارێک داعش و فەتوای بەکۆمەڵ کوشتن و جارێکیش ئەزمەی ئابووری و مەترسی برسێتی و هەندێک جاریش حەشدو هەڕەشەکانی و خاک داگیرکردن، ئەم نەوەیەی ئێستا چەند دڵخۆشن، بەئەندازەی ئەوەش خەمبار، چەند ئازادن، بەئەندازەی ئەوەش دیل، چەند ئاوێتەبووی سەردەمی مۆدێرنەو لیبڕالیزم و نەمانی جیاوازی چینایەتین بەئەندازەی ئەوەش لەبەردەم ویژدانی نوستووی وڵاتانی زلهێزدان و کەس بۆ مەرگ و مەترسێکانی سەریان نایاتە دەنگ، ئینتەرنێت و پێشکەوتنەکان ئەوەندەی خەبەری مەرگ و سوتانی خاک و گلانی شۆڕشی پێیە، ئەوەندە ماڵێک نەبووە بۆ دۆزینەوەی خەونەکان، ئەم نەوەیە نەوەی بینینی مەترسییەکان و نەوەی گێڕانەوەو شاهیدی دەیان شەپۆلی مەرگە، هەنوکە مرۆڤایەتی لەسەردەمی کۆڕۆناو مەترسییەکانیدا دەژیت، رەنگە دیارترین خاڵی هاوبەشی نێوانمان لەپەنجا ساڵی رابردوودا کۆڕۆنا بێت، بەڵام من ئەوەندەی چۆڵیی سەهۆڵەکەو جادەی مەولەویی و دەوری قەڵاو باڕاڕی نیشتیمان چاوەکانمیان پڕ لەئەسرین کردووە، ئەوەندە چۆڵبوونی بورجی ئیڤڵ و شەقامی شۆخ و شەنگی شانزە لیزێی نەی جوڵاندووم، لەبێدەنگی جادەکانی نیشتماندا  نغرۆبووم، بێدەنگی شەقامەکانی رۆماو ئۆهان و بەرلین و لەندەن منیان شۆک نەکردووە، بڕواموایە هیچ سیاسییەک نەبێت لەکوردستاندا خامۆشی شەقامەکان خامۆشی نەکردبێت، کۆرۆنا پێێوتین دەتوانین پێکەوە دوا ئامانجەکان بەدیبێنن ئەشێ جیاواز بین، ئەشێ من یەکێتی و تۆش رەنگێکی تر بیت، بەڵام دواجار هەموومان پێکەوە زیندوویەتی دەدەین بەشەقام، جیاوازی هۆکاری بنچینەی گەشەی کۆمەڵ و بوونی سیستەمێکی فەرمانڕەوایی تەندروستە، بەمەرجێک فەلسەفەکەی لەسەر بنەمای رق نەچێنرابێت، کۆرۆنا تەنها وانەی خاوێنی فێر نەکردین، بەڵکو فێری کردین پێکەوە جوانین و پێکەوە نیشتمان دەگەیەنینە دوا ئامانج، ئەمیش وەک ئەوانی تر پرسیاری ناسنامەی لەکەس نەکردووە هەمووان کوردین و هەمووشمان لەبەردەم مەترسیداین، ئیتر کاتی ئەوەیە کۆرۆنا تێ پەڕینین و لەسەر بنەمای ئیرادەی هاوبەش و دوور لەسەپاندنی یەکجۆر خیتاب داهاتووی نەوەکانمان بینابکەینەوە.