جەمسەربەندی سیاسیی نێوان دوو سەرۆك لەكۆبوونەوەی ساڵانەی نەتەوە یەكگرتووەكان سەری كێشا بۆ باسكردنی دۆسێی كوردو بێ مافییەكانی. ئەمە وەك ناونیشان و باسكردن خراپ نییە، بەڵام نابێ سەربكێشێ بۆ پێخۆشبوونێكی وا كە شتی لەسەر هەڵبچنین. پێویستە شت لەسەر خودی مەسەلەی كوردستان هەڵبچنین، هەر رەوایەتی مەسەلەكەو هێزی كوردایەتی دەتوانێ فاكتەری چۆنایەتی بێت.
بابەتەكە ئەوەیە ئیسرائیل و میسر بۆ بەرپەرچدانەوەی قسەكانی ئەردۆگان سەرۆكی توركیا دەربارەی دۆسێی فەلەستین و دۆسێی مردنی محەمەد مورسی، تانەیان لە ئەردۆگان داوە كە زوڵم و زۆر لەكورد دەكات. بەلاغێكی وەزارەتی دەرەوەی میسر راستەوخۆ رەخنە لە ئەردۆگان دەگرێت، چونكە لەتاو دژایەتی كورد بەشداریكردووە لەكوشتن و قڕكردنی كورد لەسوریا.
هەرچی نەتەنیاهۆیە خۆی راستەوخۆ وەڵامی ئەردۆگانی دایەوە كە نەخشەی ئیسرائیل و فەلەستینی دەرهێناو وتی: بۆچی ئەم نەخشەیەی فەلەستین تادێت بچووك دەبێتەوە؟. نەتەنیاهۆ وتی: ئەردۆگان بۆی نییە ئەم قسانە بكات كە خۆی زوڵم و زۆر لەكورد دەكات و دەیانكوژێ.
لێرە كورد خۆی لەخۆیدا مەسەلەیەك نییە كە لەسەری هاتبنە جواب، ئەمە وەك قسەكانی مەنگۆلیای بناگوێی یەكێتیی سۆڤێتیی جارانە كە ساڵی 1963، داوایكرد قەتڵوعامی كوردی عیراق بخرێتە بەر رۆژەڤی نەتەوە یەكگرتووەكان و بەڕەسمیی شكاتی لەحەرەس قەومی و بەعس كرد كە كورد جینۆساید دەكات. جا هەر كە بەغدا سۆڤێتی رازی كرد، ئیتر مەنگۆلیاش قڕوقپیی هەڵبژارد.
بۆ كورد دەرسە هەرە گەورەكە ئەوەیە لێنەگەڕێ مەسەلە رەواكەی وای لێ بێت كە هەر بۆ هەنجەت و رەوانبێژی سیاسیی بخرێتەگەڕ. مەسەلەی كورد لەهەموو مەسەلەكانی تری دنیا رەواترە بەمەرجێ فاكتەری ناوخۆ هەرچی زیاترە ئەم رەوایەتییە پایەدارتر بكات.