چوونی شاندێكی هێزەكانی سوریای دیموكرات بۆ دیمەشق ‌و دەستپێكردن یان رێخۆشكردن بۆ دەستپێكردنی وتووێژ لەنێوان هەردوولا بۆ گەیشتن بەسازان سەبارەت بەڕێكخستنی پەیوەندیی یاسایی نێوان كوردو حكومەتی ناوەندی، رووداوێكی سەرپێیی نییە‌و چەند مانایەكی لەخۆگرتووە، گرنگترینیان نیگەرانیی كوردە لە ناڕۆشنیی سیاسەتی ئەمریكا لەسوریاو هەروەها لە ناوچەكەو بەگومان كەوتن لە ئاراستەكانی ئەو سیاسەتە، بەتایبەتی سەبارەت بە عەفرین ‌و لەم دواییەشدا سەبارەت بە مەنبەج. سەرەتای بەگومان كەوتنەكە لە عەفرین دەستپێدەكا. ئەگەر لەكاتی قەیرانی عەفرین دا، كورد رازی بوایە سوپای سوریا بچێتە عەفرین، زیانەكە كەمتر دەبوو و بناغەیەكی پتەویش بۆ دەستپێكی پەیوەندییەكی سەقامگیرتر لەنێوان كوردو دیمەشق دادەنرا. ئەم هەڵەیە زۆر گران لەسەر كورد كەوت. بۆیە دەشێ‌ پەیامی یەكەمی سەردانەكە ئەوە بێ‌ كە كورد پەندی لەهەڵەكانی پێشووی وەرگرتووەو خوازیارە واقیعبینانەتر هەڵسوكەوت بكات.
بەدڵنیاییەوە، ئەم سەردانە بەبێ‌ ئاگاداریی روسەكان ئەنجام نەدراوە، دیارە روسەكانیش خوازیارن هاوپەیمانێكی تاقیكراوەو بەهێزی وەك كورد بەلای خۆیاندا راكێشن، بەتایبەتی كە ئەمە هەم ئەمریكا بەبێ‌ هاوپەیمان لەسوریا دەهێڵێتەوە هەم بەرەی ئەسەدی هاوپەیمانیان بەهێز دەكا.
دەشێ‌ بەمجۆرە سەیری دیمەنەكە بكەین كە دیمەشق ‌و روسەكان نایانەوێ‌ پاش گەڕانەوەی سوپای سوریا بۆ ئیدلب، تووشی بەریەككەوتن بن لەگەڵ كورد. هەروەها روسەكان دەیانەوێ‌ ئەزموونی چارەسەركردنی كێشەی نەتەوەكان لە روسیا، بگوێزنەوە بۆ سوریاو مەبەستیانە كورد دەستكەوتێكی وای لەچوارچێوەی سوریا چنگ كەوێ‌ كە ببێ‌ بەمایەی تێكهەڵكێشبونی لەگەڵ سیستمی سیاسی ‌و دروستنەكردنی گێچەڵ بۆ سەقامگیریی سوریا.
ئەو دەستكەوتانەی كە پوتین لەسوریا بۆ روسیای بەدەست هێناوە، لەمەوبەر روسیا نە لەسەردەمی تزارەكاندا بەدەستی هێناوە نە لەسەردەمی كۆمۆنیستەكاندا. پوتین خەونی مێژینەی تزارەكان ‌و كۆمۆنیستەكانی هێنایە دی ‌و سنووری روسیای تا سەر دەریای ناوەڕاست درێژكردەوە.
ئەدگاری سوریای ئایندە نە لەئەنكەرە دیاری دەكرێ‌ نە لەپاریس ‌و نە لە واشنتن ‌و هەروەها نە لە دیمەشق، بەڵكو لەمۆسكۆ دیاریدەكرێ‌. روسەكان دەزانن سوریا بەو ئابوورییە داهێزراوەی، بە تەنها دەرەقەتی پێداویستییەكانی قۆناغی بنیاتنانەوە نایەت. ئەمە بەم مانایە دێت كە روسەكان تا دەیان ساڵی تر سێكتەرەكانی ئابووری ‌و سیاسەتی دەرەوەو سیاسەتی ناوەوە لەسوریا كۆنترۆڵدەكەن ‌و سوریای ئایندە لەدەوڵەتێكی ماندێتەكراوی ژێر دەسەڵاتی روسیا هیچی تر نابێ‌. ئەمەش سیناریۆی عیراقی 1921-1958مان بەبیر دێنێتەوە كە تێیدا بریتانیا ئەكتەری سەرەكی ‌و داڕێژەری سیاسەتە ناوخۆیی ‌و دەرەكییەكانی عیراق بوو. لەنێو پێكهاتەكانی سوریادا هیچ پێكهاتەیەك بەقەد كورد لەم دۆخە سودمەند نابێ‌. ئەمەش دەبێ‌ كوردی سوریا بەو ئاراستەیە هان بدا كە ستراتیجی كاركردنیان لەم قۆناغەدا لەگەڵ ستراتیجی روسیا بگونجێنن.
لەسەر ئاستی تاكتیكی، روسیا خواستیارە نیگەرانییەكانی ئیسرائیل ‌و ئەمریكا لەنزیكبوونەوەی هێزەكانی ئێران لەسنووری جولان بڕەوێنێتەوە. مۆسكۆ ‌و دیمەشق پەی بەوە دەبەن كە تێكشكاندنی تیرۆر لەسوریا، بەبێ‌ بەشداریی هێزەكانی ئێران ‌و حزبوڵڵای لوبنان بەدی نەدەهات. بەڵام لەهەمانكاتدا پەی بەوەش دەبەن كە بەردەوامبوونی نیگەرانییەكانی ئیسرائیل ‌و ئەمریكا لەم بارەیەوە، دەشێ‌ رەوشی سوریا ئاڵۆزتر بكاو ببێ‌ بەمایەی سەرهەڵدانی گێچەڵی تر. هەر ئەمەشە كە هانیان دەدا بیر لەمیتۆدێك بكەنەوە كە هەم نیگەرانییەكانی ئیسرائیل ‌و ئەمریكای پێ‌ بڕەوێتەوە هەم نەبێ‌ بەمایەی لەدەستدانی ئێران وەك هاوپەیمانێكی كاریگەرو تاقیكراوە لەشەڕی دژی داعشدا. خودی ئێرانییەكان پەی بەگرنگیی سەقامگیریی سوریا دەبەن و پشتگیریی گەڕانەوەی ئاشتی بۆ ئەم وڵاتە دەكەن. بۆیە پێناچێ‌ هیچ لێك تێگەیشتنێكی هاوسەنگ لەم بارەیەوە رەتبكەنەوە. لەسەر ئاستی ستراتیجی، روسەكان پاش ئاسایی بوونەوەی دۆخی سوریا، كار بۆ دابینكردنی ئاشتی لەنێوان سوریاو ئیسرائیل دەكەن ‌و رێ‌ بە بەردەوامبوونی كێشەی جۆلان نادەن، بەتایبەتی كە لەدۆخی ئێستادا روسیا نەك ئەمریكا، لەململانێی عەرەب- ئیسرائیلدا بەئەكتەری سەرەكی دەژمێردرێ‌. ئەوەی ئەمە دەسەلمێنێ‌ ئەوەیە كەژمارەی سەردانەكانی بنیامین ناتانیاهۆی سەرەك وەزیرانی ئیسرائیل بۆ مۆسكۆ، دوو ئەوەندەی ژمارەی سەردانەكانێتی بۆ واشنتن.
دیارە كوردی سوریا لەم رەوشەی ئێستادا پەی بە هەموو ئەم پێشهاتانە دەبەن ‌و بەدڵنیاییەوە دەتوانن بڕیارێكی راست لەم بارەیەوە بدەن.