مستەفا چاوڕەش

یادێك بۆ هاوڕێم موزەفەر نەواب

  2022-05-21 21:20      59 جار بینراوە        کۆمێنت

یادێك بۆ هاوڕێم موزەفەر نەواب، شاعیری عیراق و عەرەب
هەقی وایە هەموو ئەو تێكۆشەرانەی كە ژیانی خۆیان تەرخانكردووە بۆ خزمەتی گەل و نیشتمان هەمیشە لە یادمان بن و رێزیان لێبگرین.
من وەك هاوڕێیەكی شاعیری گەورە موزەفەر نەواب، كە لە ساڵەكانی حەفتاوە پێكەوە بووین لە حزبی شیوعی قیادەی مەركەزی، دەمەوێت بەم چەند دێڕە باسی ئەو هاوڕێ تێكۆشەرە بكەم.
دیارە پێش ناسینی من، بە تەمەنیش لە من گەورەتر بووە كە كەسێكی دیاری عیراق بووە بە حوكمی شیعرەكانی، كە هەموویان دیفاع بوون لە هەژاران و کرێکاران و جووتیاران، چەند جار زیندانی كراوە و هاوڕێكانی شایەتی بۆ دەدەن لە زیندان.
من باسی ساڵی 1970 بۆ 1971 دەكەم، ئەو كاتەی بۆ یەكەمجار لەگەڵ  ئیبراهیم عەللاوی سكرتێری حزبی شیوعی قیادەی مەركەزی، خوا لێی خۆش بێت، پێكەوە ماوەی 10 رۆژ رێگا لە ناوچەی گەڵاڵەوە گەیشتینە دیمەشق لە سوریا 1970، لەوێش چەند هاوڕێیەكی حزبی لێ بوو. یەكێك لەو هاوڕێیانە شاعیر موزەفەر نەواب بوو، ئیتر تاكو من لەوێ بووم، زۆر کات، دەتوانم بڵێم هەفتەی دووجار یەكترمان دەبینی، چونكە من لەگەڵ ئەبو لەیلا ئیبراهیم عەللاوی پێكەوە لە شوقەیەک دەژیاین، هاوڕێیان دەهاتن بۆ لامان و لەوێ یەكترمان دەبینی، وەك عادل عەبدولجەلیل، نزار عەبدولجەلیل، خەلیل ئیبراهیم، تارق دلێمی کە خوێندكاربوون، شەوان ئەگەر فرسەتێك هەبوایە بە دانیشتن و گۆرانی بەڕێمان دەکرد، جگە لە كاری حزبی.
دەمەوێ بێمەوە سەر هاوڕێی کۆچکردووم موزەفەر نەواب، جگە لەوەی شاعیرێكی گەورەی هەژاران بوو، دەنگیشی زۆر خۆش بوو، بە دەنگی خۆی گۆرانی (ریل و حەمەدی) بۆ دەوتین، زۆر شتی تریش، كەسێكی قسەخۆش و سوعبەتچی بوو، جارجارەش كەمێك مەست دەبوو، باسی ژیانی زیندانی نوگرە سەلمانی بۆ دەكردین.
هەر لەو ماوەیەدا،  ئەبو لەیلای سكرتێری حزب، بە ئیشی حزب من و موزەفەر نەواب-ی نارد  بۆ عەممان بۆ لای نایف حەواتمە ئەمینداری جووڵانەوەی شەعبی دیموكراتی فەلەستین، هەروەها بۆ لای جۆرج حەبەش ئەمینداری بەرەی گەلی فەلەستین، بۆ رێكخستنی هەندێك ئیشوكار، هەروەها داوای هاوكاری لێیان بۆ خەبات لە دژی رژێمی سەدام حسێن. دوو رۆژ پێكەوە بووین، هاوڕێیەكی بە ئەمەك بوو، رۆژێك لە رۆژان پشتی نەكردە هەژاران، وڵاتی بەجێهێشت و هەر لە دوور وڵاتی سەرینایەوە.
جارێك هات بۆ كوردستان بۆ بارەگاكەمان لەناو كیلەكان لە ناوچەی گەڵاڵە ماوەیەك مایەوە، ئەو كاتەش كاك فاروق مەلا مستەفا لەوێ بوو، لە جارەكانی دیمەشقیش هەر پێكەوە بوون، هاوڕێیەکی دڵسۆزی بوو.
هەزاران سڵاو لە گیانی ئەم شاعیرە گەورەیە و ئەم پیاوە تێكۆشەرەی هەژاران.
مستەفا چاوڕەش

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو