لەیلا عومەر

دەستە خوشكایەتیی نانت و سلێمانی

  2021-12-06 19:20      73 جار بینراوە        کۆمێنت

لەجیهاندا جگە لە پەیوەندی سیاسی و ئابووری رەسمی نێوان وڵاتان لەسەر ئاستی سەرۆكایەتییەكان و وەزارەتی دەرەوە، جۆرێك لە پەیوەندی دیكەش هەیە كە بریتییە لە پەیوەندیی نێوان شارەكان كە بە زمانی باو پێی دەوترێت «دەستە خوشكایەتی» ئەمە پەیوەندییەكە راستییەكەی جۆرێكی جیاوازە لە پەیوەندیی رەسمی و دەتوانرێت ئاسانتر ئەزموونەكان ئاڵوگۆڕ بكرێن و سوودی كەلتووری زیاتریشی هەبێت.
لە چەند رۆژی رابردوودا و لە میانەی سەردانێكمدا بۆ فەرەنسا كۆمەڵێك كۆبوونەوەی گرنگ و بەسوودمان كرد بە ئامانجی خزمەتكردنی زیاتری هەرێمی كوردستان و شاری سلێمانی پایتەختی رۆشنبیری، یەكێك لەو چالاكییانە كۆبوونەوەم بوو لەگەڵ جێگری پارێزگاری شاری نانتی فەرەنسی كە یەكێكە لە شارە هەرە پێشكەتوو و جوانەكانی فەرەنسا.
شاری نانت مێژوویەكی جێگە سەرنجی لە پێشكەوتن و پەرەپێدانی لایەنە جۆراوجۆرەكانی هەیە، دوو سەدەی بیست و بیست و یەك بۆ نانت قۆناغێكی مێژوویی گرنگە دوای ئەوەی بە چەندین شەڕ و داگیركاریدا تێپەڕی و سەرەنجام بە هەوڵ و كۆششی خەڵكەكەی و بەرپرسەكانی توانیان نانت بكەنە یەكێكە لە هەر جوانترین و پێشكەوتووترین شارەكانی فەرەنسا.
نانت پایەیەكی گرنگی ئابووریی فەرەنسایە و بە جۆراوجۆرێتی وەبەرهێنان و داهێنان دەناسرێت و چەندین كارگەی گرنگی تیادایە و دەرفەتی كاری بۆ ژمارەیەكی زۆری كرێكار رەخساندووە، ئەوەش وایكردووە جووڵەی بازرگانی زۆری تیادا بێت و ژمارەیەكی زۆر كۆمپانیای گەورە بارەگای سەرەكیانی تیادا دابنێن، لەگەڵ ئەوەشدا بواری خوێندن و فێربوون لە ئاستێكی باڵادایە و لەلایەن بەرپرسانی شارەكەوە گرنگی زۆری پێدەدرێت.
شاری سلێمانی بەهەمان شێوە مێژوویەكی دوورودرێژی هەیە و لە چەندین قۆناغی مێژووییدا داگیركراوە و ستەمی داگیركەرانی لەسەر بووە، بەڵام هەرگیر كۆڵی نەداوە و بۆ ئازادی و سەربەستی خەباتی كردووە و دەبینین رۆژ لە دوای رۆژی لە پێشكەوتندا بووە.
سلێمانی پایتەختی رۆشنبیریی هەرێمی كوردستانە، لە بواری ئەدەب و ئازادی رۆژنامەوانی و نووسیندا لە پێشكەوتووترین شارەكانی كوردستان و عیراقیشە، هەروەها ژینگەیەكی پاكی هەیە و گرنگی زۆر بە سەوزایی داوە، چەندین كارگەی گرنگیش لە سنووری سلێمانی هەن و كاری جدییش دەكات بۆ ئەوەی لە رووی بازرگانییەوە پێشبكەوێت.
ئێستا سلێمانی لەسەر رێگەی پێشكەوتنە، هەروەها كەموكووڕی زۆریش هەیە و پێویستمان بەوە هەیە كار بۆ چارەسەركردنیان بكەین، لەو رووەوە پێویستمان بە سوودوەرگرتن لە ئەزموونی یەكتر هەیە، بۆ ئێمە ئەزموون و قۆناغەكانی پێشكەوتنی شاری نانت و چۆنییەتی بەڕێوەبردن و نموونەی پێشكەوتنی كەرتی بازرگانی و ئابووری ئەوان گرنگە و دەمانەوێت سوودی لێوەربگرین، بۆ ئەوەش هەردوولا كاردەكەین ببینە دەستە خوشكی یەكتر و باشترین پەیوەندی لەسەر ئاستەكانی بەڕێوەبردن، ئابووری، كەلتوری بنیادبنێین.

وتاری زیاتر



پلانی وردتری دەوێت‬ لەیلا عومەر
2021-12-20 15:45      62 جار بینراوە


فەرەنساو دوو وێنەی جیاواز‬ لەیلا عومەر
2021-11-29 15:58      62 جار بینراوە


کۆچ و گەڕانەوەی ناچاری‬ لەیلا عومەر
2021-11-15 18:25      99 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو