ئاوات كۆكه‌یی

یەكێتیی نیشتمانیی کوردستان حزبی شەهیدانە

  2021-11-22 15:49      58 جار بینراوە        کۆمێنت

یەكێتی لە 1/6/1975 دامەزرا، ساڵێك دواتر و لە هەمان رۆژدا شۆڕشی چەكداریی راگەیاند و مەفرەزەی پێشمەرگەی ناردەوە شاخەكان.
یەكێتی هێشتا لە سەرەتای خۆ راگەیاندندا بوو، كە پۆلێك لە سەركردەكانی كۆمەڵە لە گەلەكۆمەكێی نێوان هەردوو رژێمی بەعس و ساواکی ئێران، دەستگیركران و لە هەمان ساڵی جاڕدانی شۆڕشیشدا، سێ لە دیارترین ئەو سەركردانە، لە 21/11/1976 لە سێدارە دران.

كاروانی شەهادەت لە 1976 تا ئێستا
پێش ئەوەش، كە تەنها سێ مانگ و چەند رۆژێك بوو شۆڕشی نوێ هەڵگیرسابوو، یەكەم مەفرەزەی شۆڕشی نوێ مەفرەزەی ناوخۆ لە شارەزوور، لە رۆژی 13/9/1976 لە گوندی قاینجەی سەید سادق، رووبەڕووی هێزێكی زۆری سوپای عیراق بوونەوە و شەڕێكی سەخت رویدا، لە ئەنجامدا فاتیح شێخ حەیدەر شەهیدكراو بووە یەكەم شەهیدی شۆڕشی نوێ لە سنووری پارێزگای سلێمانی.

یەكەم مەفرەزەی شۆڕشی نوێ، مەفرەزەی دەرەوەی وڵات-بادینان، كە لە یەكەم رۆژی جاڕدانی شۆڕش لە 1/6/1976 لە سوریاوە گەڕانەوە وڵات و لە ناوچەكانی بادینان كەوتنە جموجۆڵ و چالاكیی شۆڕشگێڕانە، هەر لە سەرەتاوە كەوتنە بەر چاودێریكردن و هێرشی نەیارانی ناوخۆ و سیخوڕەكانی دەوڵەتی عیراقەوە.

سەرئەنجام كۆی مەفرەزەكەی بادینان بە فەرماندەیی برایم عەزۆ كە 37 پێشمەرگە بوون، لە نێوان مانگەكانی ئاب تا 19/10/1976 هەندێكیان لە روبەڕووبوونەوەدا و زۆربەشیان كە بە فێڵی میواندارییەوە دیلكرابوون، شەهیدكران و چوار پێشمەرگەش دوای دەربازبوونیان لە تەڵەی نەیارانی ناوخۆ، كەوتنە دەست حكومەتی عیراق و دواتر لە سێدارە دران.

بە درێژایی ساڵی 1977یش حكومەتی عیراق كەوتە لە سێدارەدانی پێشمەرگە و رێكخستنەكانی یەكێتی ئەوانەی كە دەستگیركرابوون، ئەمە جگە لەو پێشمەرگانەی كە لە شەڕەكاندا شەهید دەكران، هاوكاتیش گێچەڵی ناوخۆیی دژی یەكێتی نەك رانەوەستا، بەڵكو زیاتریشی كرد و بە ناهەق پێشمەرگە شەهید دەكرا، بۆ نموونە: كەسایەتی دیار و كادری چالاكی سیاسی و سەربازی حەسەن خۆشناو لە گەڵ شەش پێشمەرگەی تردا لە رۆژی 13/10/1977 شەهیدكران.

كاروانی شەهادەت هەر درێژەی كێشا و رێگەكەش بەردەوام و كوردستانیش بە خوێنی پۆلە شەهیدی یەكێتی ئاڵ تر دەبوو، ساڵی 1978 لە ناوچەی هەكاری نزیكەی 1000 پێشمەرگە و سەركردە و كادری یەكێتی بە گەلەكۆمەكێی ناوخۆیی و وڵاتانی دەورووبەر شەهید كران، هەمان ساڵ سەركردە سەعدی گچكەو 15 پێشمەرگە و كادر لە شەڕێكی سەخت لەگەڵ سوپای عیراقدا شەهید كران، هەر هەمان ساڵ لە چەندین جێگە و شوێنی دیكەدا پێشمەرگەی یەكێتی شەهید كراون.

ساڵ لە دوای ساڵ یەكێتی بەهێزتردەبوو، پیلان و دژایەتیکردنی یەكێتی لە لایەن ناحەزان و دوژمنانەوە چڕتر دەبوونەوە، یەكێتی بە پۆل پێشمەرگەی لە شەڕەكاندا شەهید دەكران، پێشمەرگە و رێكخستنەكانی لە زینداندا لە سێدارە دەدران یاخود گوللەباران دەكران.

یەكێتی بووە چەتری هەموو تێكۆشەرانی كوردستان و تاكە هێزی جێگەی ئومێد و هیوای كورد كە بتوانێ كورد لە كەناری تیاچوون و سڕینەوەدا بگێڕێتەوە و گیانی مقاوەمەت و بەهێزی پێ ببەخشێت، دیارە ئەمەش بە نرخی خوێنی رۆڵەكانی.

لە دەرئەنجامدا یەكێتی وایلێهات بۆ هەموو پیلانێكی دوژمن دژ بەكورد، پۆلێك لە تێكۆشەرەكانی دەبەخشی، بەخوێنی ئەوانیش كوردستان لە مەترسی تیاچوون بەرەو سەرفرازی و ئازادبوون هەنگاوی ناو گەیشتە راپەڕینی ئاداری 1991.

یادی پیرۆز لە هەواڵنامە و دەفتەری سەروەریدا
لە دوای ئەوەی كە قەوارەی هەرێمی كوردستان كەوتە بەر هەڕەشەی تیرۆریستانی داعش، ئەوە هەر یەكێتی بوو دەستوبردی كرد و بازنەی بەرگریی بە چوار دەوری كوردستاندا كێشا و نەیهێشت ئەو ئاگرە بگاتە خەرمانی ئارامی و ژیانی ئاسایی خەڵك، دیسان ئەو پارێزگارییەش بە نرخی خوێنی رۆڵەكانی یەكێتی فەراهەم بوو.

جا كە یەكێتی بە حزبی شەهیدان ناوزەد كرابێت، حەتمەن دەبێت پرسی شەهیدان، یادكردنەوە و بەرز راگرتنی رۆژی شەهیدان، قارەمانێتی و خۆڕاگرییان، چاودێریكردنی كەسوكاریان یەكێك بێت لە ئەركە بنەڕەتییەكانی یەكێتی و پلانی ورد و هەنگاوی گەورەی هەبێت بۆی.

لە راستیشدا یەكێتی هەر لەسەرەتاوە گرنگی بە پرسی شەهیدان داوە و زوو كەوتە كۆكردنەوەی ژیاننامەی شەهیدان و چالاكییەكان و گیانفیداکارییەكانی پێشمەرگە.

ساڵی 1977 كە ئامێرەكانی چاپ و كەرەستەكانی چاپەمەنی و توانای مادی هەر زۆر كەمبووە و ئەوی هەشبووە بە قاچاخ و بە نرخێكی زۆر گران بووە، شوێنێك نەبووە بۆ هەڵگرتنی ئەرشیف و سەرقاڵبوون بە ئامادەكردنی كتێب و ئەلبوومی تایبەت بە شەهیدان، بەڵام یەكێتی لەو ساڵەدا دەكەوێتە خۆی و ژیاننامەی شەهیدەكانی سەرەتای شۆڕش لە كتێبێكدا بەناوی ( دەفتەری سەروەری) لە چەند بەرگێكدا چاپ دەكات، هەروەها لە بڵاوكراوەكانی (هەواڵنامە و كۆمەڵە)دا گرنگی بە پرسی شەهیدان داوە.

جگە لەوەش ئەو نامە و دەستخەتانەی كە پێشمەرگە و ئەندامانی یەكێتی لە زیندان و لە ژێر پەتی سێدارەدا دەیناردنە دەرەوە، یەكێتی دەیانكات بە كتێبێك بەناونیشانی ( چەند نامەیەك لە زیندانی فاشیستەكانەوە).

ئەمانە و زۆر كاری دیكەی وەك پۆستەر و ساڵیادی شەهیدان بەشێوەی كۆڕ و مەراسیم، لە سەرەتای شۆڕش و لە سەردەمی نەبوونی كەرەسەتەكانی چاپ و چاپەمەنیدا.

لێرەوە دەردەكەوێت كە یەكێتی گرنگیی زۆری بە پرسی شەهیدان داوە و بە بایەخەوە كاری لەسەر كردووە تا ناو و ناوبانگ و خەبات و گیانفیدایی شەهیدان هەر بەدرەوشاوەیی بمێنێتەوە و ببێتە هۆی بەرزبوونەوەی ورە و گیانی بەرگریی بۆ هەڤاڵان و نەوەكانی دوای خۆشیان.

خزمەتكردن هۆكارێكی دیكەی ناسناوەكەیە
بەدرێژایی تەمەنی یەكێتی لە قۆناغی خەباتی چەكداریدا، بەشێكی راگەیاندنەكەی تەرخانكردووە بۆ ئەو پرسە، لە بڵاوكراوەی تایبەت، كۆڕو ساڵیاد، پۆستەر و وێنە، گۆڤار و مانگنامە و كتێبی تایبەت، بەرنامەی كاروانی شەهیدان لە ئیزگەكە ( رادیۆی دەنگی گەلی كوردستان)، لە هەموو ئەوانەدا بە بایەخ و گرنگییەوە یادی شەهیدان كراوەتەوە.

لە دوای راپەڕینیش، یەكێتی بە شێوەی فراوانتر و بە بەرنامەی هەمەلایەنە و پێشكەوتووتر لەو رووەوە كاری كردووە و تاكە حزبە گرنگیی زۆری بە یادكردنەوەی شەهیدان داوە.

لە ژمارە سفری رۆژنامەی كوردستانی نوێدا باسی شەهیدان كراوە، بەدرێژایی تەمەنی 30 ساڵەی رۆژنامەكە پاشكۆ و گۆشە و لاپەڕەی تایبەت بە شەهیدان هەبووە و ئێستاش بەردەوامە بەناوی لاپەڕەی (سەروەران).

لە رادیۆی دەنگی گەلی كوردستان، تەلەفزیۆنی گەلی كوردستان و باقی رادیۆكان و تەلەفزیۆنە لۆكاڵییەكانی دیكەی دەزگاكانی یەكێتی لە ناوچە جیاجیاكان، بە جدییەوە لا لە مێژووی شەهیدان كراوەتەوە، ئەمە جگە لەوەی چەندین كتێبیش بۆ ئەم مەبەستە تەرخانكراوە و ئێستاش بەردەوامە، هەروەك كتێب و نامیلكە و بڵاوكراوەی تایبەتیش بە كەسوكاری شەهیدان بڵاوكراوەتەوە.

یەكێتی تەنها بەوەوە نەوەستاوە یادی قارەمانێتی شەهیدان بكاتەوە، هەر لە سەردەمی شاخەوە كە باری ئابووری شۆڕش خراپیش بووە، بەڵام هاوكاری و دەستگیرۆیی كەسوكاری شەهیدان كراوە، لە دوای راپەڕینیش بەزوویی دەزگای تایبەتی دامەزراند بە ناوی كۆمیتەی شەهیدانی ی.ن.ك و مووچەی بۆ وارسی شەهیدان بڕییەوە، پاشان كۆمیتە بوو بە دەزگا و ئێستاش بە مەكتەب، تەنانەت سەرۆك مام جەلال یاریدەرێكی خۆی تایبەت كردبوو بە كاروباری شەهیدان بەناوی یاریدەدەری سكرتێری گشتی بۆ كاروباری شەهیدان.

كە حكومەتی هەرێمیش دامەزرا، یەكێتی رۆڵی گرنگی بینی لە دیاریكردنی وەزارەتێكی تایبەت بەشەهیدان.

لەوەش گرنگرتر یەكێتی چ وەك حكومەت و چ وەك حزبیش بەرنامەی تایبەتی هەبووە و هەیە بۆ هاوكاری كوڕ و كچی شەهیدان لە كاتی زەماوەندكردنیاندا، یاخود بۆ خوێندن و چوونەوە دەرەوەی وڵات، یان بۆ كاتی نەخۆشی و دووچاربوونیان بە كێشە و گرفتی جۆراوجۆر.

نەخۆشخانەی شۆڕشیش هەر لە سەر پێشنیازی سەرۆك مام جەلال دامەزرا و لەوێوە خزمەتێكی زۆر بە كەسوكاری شەهیدان كراوە.

سەرەڕای هەموو ئەمانەش بەشێوەی تایبەتیش هاوكاریی و دەستگیرۆیی كەسوكاری شەهیدان دەكرێت و كراوە.

هەموو ئەوانەی باسمانكردن بەشێكن لە گرنگیدانی یەكێتیی نیشتمانیی كوردستان بە پرسی شەهیدان و كەسوكاری شەهیدان و ئێستاش هەر بەردەوامە.

لێرەدا دەردەكەوێ كە یەكێتی بە هەق حزبی شەهیدانە، ئەوەش تەنها لەبەر ئەوە نا كە خاوەنی زۆرترین شەهیدە، بەڵكوو لەبەر ئەوەش خەمخۆرێكی جدیی مێژووی شەهیدان و پەرۆشی خزمەتكردنی كەسوكاری شەهیدانە.

ئەمە لەسەر ئاستی حزب، لە سەر ئاستی حكومەتیش، ئەوەی لە ماوەی ساڵانی تەمەنی حكومەتی هەرێمیش كراوە لە بواری مووچە و زەوی نیشتەجێبوون و باقی ئیمتیازاتەكانی دیكەی كەسوكاری شەهیدان، لە بنەڕەتدا بەرنامە و نەخشە رێگەی یەكێتی بووە و بە پێداگری و گوشاری یەكێتی کراوە.

وتاری زیاتر













نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو