مەریوان مەسعود

نامە توندەكەی (تاڵەبانی) بۆ رۆژنامەنووسە ئیسرائیلییەكە!

  2021-11-14 21:45      92 جار بینراوە        کۆمێنت

28

لەساڵی 1997، هەر یەكسەر دوای ئەوەی كتێبی (الموساد فی العراق و دول الجوار) تەرجەمە كرا بۆ عەرەبی، مام جەلال تاڵەبانی ئەو كاتە نامەیەكی توندو موفەسەڵی بۆ نووسەری كتێبەكە (شلۆمۆ نكدیۆن) بە زمانی عەرەبی نووسی و بە ئیمزای خۆی بۆی نارد، نامەكە ئەو كاتە لە میدیای كوردی بایەخی پێنەدرا، لە كاتێكدا نامەكەی مام جەلال كە لەدوو پەڕە پێكهاتبوو، زۆر هەقیقەتی مێژوویی روونكردۆتەوە، كە ئەم رۆژنامەنووسە ناودارە ئیسرائیلییە كەوتۆتە هەڵەوەو مام جەلال لەسەرەتای نامەكە بۆی دەنووسێت:

«كاك شلۆمۆ نكدیۆن ی بەڕێز
وەرگێڕانە عەرەبییەكەی كتێبەكەتان (الموساد فی العراق و دول الجوار)م خوێندەوە و بینیم ناوی منتان بردووە جا بە مەبەست بێ‌ یان بێ‌ مەبەست گوایە من لە تشرینی 1963 لەگەڵ مامۆستا ئیبراهیم ئەحمەد سەردانی باڵیۆزخانەی ئیسرائیلمان كردووە لە پاریس، لێرەوە پێتان رادەگەیەنم كە ئەم زانیارییانە بەتەواوی ناڕاستن و سەرلەبەریان رەتدەكەمەوە، و وا لێرەش ئەم راستیانەتان بۆ دەخەمە ڕوو بە هیوام لە چاپی نوێی كتێبەكەتان راستیان بكەنەوە».

دوای ئەوە مام جەلال بە عەرەبییەكی رەوان و ورد، بە چەند خاڵێك ئەوە بۆ نووسەرە ئیسرائیلییەكە روون دەكاتەوە كە ئەو هەرگیز نە لەگەڵ مامۆستا ئیبیراهیم ئەحمەد و نە لەگەڵ هیچ كەسێكی تر نەچووە بۆ پاریس و بۆ باڵیۆزخانەی ئیسرائیل لەو وڵاتە، بۆیە دەنووسێت:

«جارێ‌ من لە مانگی تشرینی 1963 هەر لە كوردستان بووم و سەرپەرشتی شەڕێكی گەورەم دەكرد كە لەنێوان هێزەكانی پێشمەرگەو هێزەكانی عیراق بەرپاببوو لە ناوچەكانی شوان- ئاغجەلەر- چەمی رێزان، بەڵگەو راستییەكانیش لە ئەرشیفی سەربازیی سوپای عیراق هەیە و جگە لەوەش هەزاران كەس شاهیدن كە من لە كوردستان بووم. ئەمە جگە لەوەی لە پێكهاتەی ئەو وەفدە حزبیە نەبووم كە مامۆستا ئیبراهیم ئەحمەد سەرپەرشتی دەكرد لە پایزی 1963 بۆ هەر یەك لە وڵاتانی یەكێتیی سۆڤیەت و چیكۆسلۆڤاكیاو ئەڵمانیای دیموكرات و فەرەنسا. بەڵگەی رەسمیی لەو وڵاتانەش هەن بۆ راستی قسەكانم».
لەوانەیە بەلای زۆر سەركردەو كەسایەتی ئەم روونكردنەوەیەی مام جەلال بە پێویست نەزانرابێت، چونكە دەڵێن كتێبێكەو بە ئیسرائیلی نووسراوەو كەی گرنگە، بەڵام مام جەلال وای نەبینیوە، بەڵكو نامەكەی داوە بە میدیا عەرەبیی و بیانییەكانیش بۆ ئەوەی بڵاوی بكەنەوەو لە ئەرشیف بمێنێت، چونكە بەلای مام جەلال-ەوە مێژوو كە بە چەواشەكاری رۆیشت، هەر وا دەمێنێتەوە.

مام جەلال تاڵەبانی، دوای ئەوە بە وردیی و بە بەڵگە بۆ نووسەرەكەی رووندەكاتەوە كە ئەو لە كوردستان بووە لەو كاتانەی ئەو باسی دەكات، لە بەشی كۆتایی نامەكە، دەنووسێت:

«من نازانم بە رێكەوت بووە یان بە ئەنقسەت ناوی منت هێناوە گوایە لە باڵیۆزخانەی ئیسرائیل لە پاریس وا تۆماركراوە، ئەمە لەكاتێكدا من هەرگیز سەردانی ئەم باڵیۆزخانەیەم نەكردووە».
دیارە لەم نامەیەدا، ئەوەشی خستۆتە ڕوو كە مەبەستی لە راستكردنەوەی ئەم زانیارییانە (ترس) نییە لە پەیوەندی لەگەڵ ئیسرائیل بەڵكو ئەو پێی وابووە كە مێژوو چۆن بووە دەبێت ئاوا بوترێت و بنووسرێت، بۆیە لە دوو خاڵی كۆتایی نامەكەدا كە لە 4/9/1997 نووسیوویەتی، دەڵێت:

«من هەرگیز دژی ئەوە نەبوومە كە پەیوەندیمان لەگەڵ جولەكە نەبێت لەبەر ئەوەی جولەكەن، چونكە من چەندین هاوڕێی جولەكەم هەبووەو هەیە، جگە لەمەش بۆ لەمەودوا پەیوەندی نێوان كوردو جولەكەكان نە تاوانەو نە رێگەپێنەدراوە، بەتایبەت دوای ئەو پێشكەوتنەی لە پەیوەندی نێوان ئیسرائیلییەكان و فەلەستینییەكان لەلایەك و ئیسرائیلییەكان و چەند وڵاتێكی عەرەبی لەلایەكی تر هاتۆتە ئاراوە، بۆیە هیچ وڵاتێكی عەرەبیی مافی ئەوەی نییە باس لە كورد بكات كە بۆچی پەیوەندی لەگەڵ ئیسرائیل هەیە، تەنیا ئەو كاتە مافیان هەیە، كە دژی بەرژەوەندییەكانی ئەوان بێت. لە دێڕی كۆتایی نامەكەش نووسیویەتی (والسلام علی من اتبع الهدی).

ئەوەندەی من بەدواداچوونم بۆ كرد هیچم دەستنەكەوت لەوەی ئایا نووسەرە ئیسرائیلیەكە لە چاپی نوێی كتێبەكەی ئەم روونكردنەوەی تاڵەبانی بەهەند وەرگرتووە یان پشتگوێی خستووە، یان ئایا بە نامەی تر وەڵامی تاڵەبانی داوەتەوە؟، ئەمەش نازانم… بۆیە بەهیوام خوێنەران ئەم گۆشەیەم بۆ تەواو بكەن ئەگەر زانیاری تریان هەیە لەسەر ئەم نامەیە و وەڵامەكەی، بەڵام ئەوەندە لای من مەعلومە كە مام جەلال ویستوویەتی رای گشتیی عەرەبی و نێودەوڵەتی لە وەڵامەكەی ئاگاداربن و هەر واشی كردووە.

وتاری زیاتر



یەكێتی و دەستووری گەلپەسەند‬ مەریوان مەسعود
2021-10-31 18:56      57 جار بینراوە


نامە ناودارەكەی دۆستۆیڤسكی‬ مەریوان مەسعود
2021-10-16 17:07      63 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو