مەلا بەختیار

بەراوردێک لەنێوان ژەهرخواردکردنم و هەوڵی تیرۆرکردنم (25/10/2005)

  2021-11-01 23:33      94 جار بینراوە        کۆمێنت

هەموو مرۆڤێک هەر دەمرێ مردنیش بەگشتی تەمەنی بۆنییە، هەموو مرۆڤایەتی هاوقەبرین، بەڵام کەسانی سیاسی، پێشمەرگە، فەرماندەو بەرپرس، دەبێ چاوەڕوانی مردنی نائاساییش بکەن، حکومەت بەردەوام هەوڵی کوشتنی داوم. چەندجارێکیش هەوڵەکانیان جێبەجێکردووە، بەڵام رێکەوت پاراستومی، لەشەڕی ناوخۆدا، کە قەت نەدەبوو ئەوەندە درێژە بکێشێت (1976-1998) دووجار پارتی هەوڵی لەناوبردنی داوم، ئنجا هێزەکانی قاعیدەو داعشیش چەندجارێک هەوڵیانداوە تیرۆرم بکەن، لەسلێمانی، فڕانکفۆرت و دوزخورماتوو، دیسان دەرباز بووین.
(25/10/2005)  ترسناکترین هەوڵی تیرۆرکردنم جێبەجێکرا، هەفتەیەک لەمەوبەر یادی ئەم هەوڵەبوو کە من بڕستی ئەوەم نەبوو بەهۆی چارەسەرەوە بەراوردێکی تیرۆرکردنم لەسەر دەستی قاعیدەو ژەهرخواردکردنم لەسەر دەستی هەڤاڵان!!! ) )
بکەم، مێژووی تیرۆرکردنەکانم هەمیشە لەلایەن فاشتەکان و قاعیدەی رەشەکوژەوە، یان لەئەنجامی شەڕی ناوخۆوە بووە، ئەوانەی لەسەنگەری دوژمنایەتی یەکێتییەوە، هەوڵی تیرۆرکردنی من و هاوسەنگەرەکانیان داوم، تەنانەت سەرۆک مام جەلال و شادڕەوان نەوشیروان و سەرکردەی تریش، هەروەها لەکاتی سەرۆک وەزیراندا کاک کۆسرەت و دکتۆر بەرهەمیش هەوڵی تیرۆرکردنیان درا. ئەوکاتە دەمانزانی بۆ هەوڵی تیرۆرکردنمان دەدرێت، چونکە لەسەنگەرەکانی پێشەوەی شۆڕشگێڕێتی و دیموکراسیدا بووین (دوورلەئێستا)، بەڵام دوای ئەوەی یەکێتی لەپەیامە مێژووییەکەی بەهۆی زاڵبوونی بەرژەوەندی خۆپەرستی و دەستەگەرییەوە، بەهۆی دەستخستنە ناو بازاڕو بازرگانی ناشەرعییەوە، یەکێتی بەڕواڵەت ئەیویست هاوسەنگی بەدی بێنێت، بەڵام بەکردەوە لەدوای چوارەمین کۆنگرەوە، سەنگی پێش کۆنگرەشی لەدەستدا، لەم هەڵبژاردنەی عیراقدا 300 هەزار دەنگدەر، متمانیان لەیەکێتی سەندەوە.
لەناو دۆخێکی ئاوای ناشەریفانەو پڕاوپڕ لەخۆپەرستی و مەزنخوازی ناڕەوادا، ململانێکانی یەکێتی لەبەرامبەر نەیارەکانیدا، بەبەرنامە، لەژێر پەردەی هاوسەنگی دروستکردن، ململانێکانیان لەناو یەکێتی چڕکردەوە، بەچڕکردنەوەی ململانێکانی ناو یەکێتی، ئیتر ریزەکانی یەکێتی ناو یەکێتی، کۆتایی هات، بۆیە ئەبینین تەکەتولەکان بەئاشکرا ئیش ئەکەن. هێزی تایبەتی هەندێک لەسەرکردەکان بەهێزتر کراون، تەواوی ژیانی حزبایەتی پێشێل کرا، گەندەڵی و سەرانە سەندن و موڵکی حەرام دابەشکردن کەوتۆتە سەر وێردی هەموو زمانێک.
لەدۆخێکی وادا پێوەرە حزبییەکان و مۆڕاڵی حزبایەتی دەکرێنە پەڕۆی بێ نوێژ، ئیتر هەرچی بەهای مروڤایەتی و ئایدۆلۆجی هەیە نامێنێت، تەنانەت وای لێدێت چاودێریی کادرەکان لەفەیسبووک بکەن بزانن وێنەی بەرپرسەکانیان لەسەر تەنەکەی ماستاو دەنەخشێنن یان نا؟
لەو چوارچێوەیەدا ژەهرخواردکردنمان لەناو یەکێتی، ئەنجامێکی فاشستیانەی چاوەڕوان کراوە، زۆرجار لەمێژوودا بەشێکی چەپەکان هەڵدەگەڕێنەوە بۆ فاشییەت، پرەنسیپی بنچینەی نازییەکان ئەوەیە، یان لەگەڵمی یاخود دوژمنمی، واتە بێلایەنی سەربەخۆیی لەناو ژیانی حزبایەتی رەتدەکەنەوە. 
بەدرێژایی مێژووی یەکێتی شانازیمان دەکرد کە شۆڕشگێڕین، شانازیشمان دەکرد کە دوژمنەکانمان ئەوەندە لێما ئەترسان پیلانیان لێ ئەگێڕاین. بەڵام ئێستا لەناو ململانێکانی یەکێتی، لافی چ بیروباوەڕێک لێ دەدرێ و شانازی بەکام ململانێوە بکرێت؟
چۆن ساڵانە یادی ژەهرخواردن لەناوخۆماندا بکەین؟ ئەوانەی تاوانەکەیان ئەنجامداوە، شەرم ئەکەن باسی بکەن.
ئێمەش کە تاوانەکەمان بەرامبەر ئەنجامدراوە، لەبەر دابونەریتی کوردەواری و شکۆی مام جەلال، ئارام ، عەلی عەسکەری، شیهاب، دکتۆر خالد ، شێخ حسێنی یەزیدی، سەعدی گچکە، رەوف بەگ، رەسول مامەند، سەید کەریم، ملازم تایەر علی والی، تاد.... ناتوانین بەدڵی خۆمان باسیشی بکەین.
ئەو شەوەی لەکونە گورگ (25/12/1977) هەوڵی کوشتنیان داین بەشایی شۆڕشگێڕانم دەزانی، ئەو رۆژەی دوو خۆکوژ خۆیان پیا تەقاندمەوە لە (25/10/2005) بەشانازی رۆشنگەریم ئەزانی. ئەو رۆژەی لەگەڵ شێخ جەعفەر لەدووزخورماتوو (ْ 24/8/2014) کەوتینە بۆسەی داعشەکانەوە بەسەر بڵندی بەرەنگاری تاریکپەرستی و هێزی خۆکوژم ئەزانی.
بەڵام ئێستا بچمە سەر قەبری مام جەلال بڵێم چی؟ بچمە تەنگی سەر چی بەئارام بڵێم؟ بەشیهابی شێخ نوری بڵێم ئێوە کەم ژیان و کەڵ ژیان، بەڵام ئێمە زۆرتر ژیاین کەچی خەریکە بە (گوێ درێژی) سیاسی لەسەر هەڵوێستەکانمان لەناو ئەبرێین.
چی بە کاک کۆسرەت بڵێم، کەی قەول و قەرار وابوو؟ کە بەئەنجومەنی باڵا رازی بووین بۆئەوەی کێشەکانی یەکێتی لەناو کۆنگرە قوڵتر نەبێت، کەچی هەوڵی لەناوبردنمان دەدرێت، قەت نەدەبوو ئەنجومەنی باڵا رێبدا یەکێتی بگاتە ئەم رۆژگارە نالەبارە. ئەگەر کێشەکانمان پێ چارەسەر نەکرایە، دەتوانرا وای بەسەرنەیەت. بەداخەوە خراپتریش بەڕێوەیە.
روو دەکەمە هێرۆ خانی میهرەبان و پێی دەڵێم : میهرەبانیت زاڵکرد بەسەر ژیانی حزبایەتیدا، بۆیە بەشێکی چواردەورت پاداشتێکی ناجومێرانەیان دایتەوەو لەپەنای خۆتا پیلانیان لێ ئەگێڕایت.
هەرچی چۆنێک بووە بەشانازییەکانی خۆمان و شەرمەزارییەکانی بەرامبەرەکانمان ئێمە ماوین . ئەوانەی وایان ئەزانی لەدوای چوارەمین کۆنگرەوە تەواو پەراوێزیان خستبووین، تێگەیشتن یەکێتییە رەسەنەکان و تێکۆشەرە دێرینەکان و هەڤاڵانی دڵسۆزی یەکێتی، لەویژدانی خۆیاندا ئەو پەراوێزخستنە رەتئەکەنەوەو هاوکێشەکانی ناو یەکێتی روو لەگۆڕانکاری بابەتی بوو، بۆیە چاریان نەما تەنها هەڵگەڕانەوە نەبێ بۆ رەگەزی فاشیانە. ئەویش لەناوبردنی جەستەییە. بەڵام ئەم پیلانە چ بەرامبەر بەخۆم و چ بەرامبەر هەڤاڵانی تر، لاپەڕە رەشەکانی رابردوو تاڕادەیەکی زۆر دادەخات. ئیتر هەڤاڵانی یەکێتی بەچاوی یەکێتییەکی رەسەن و شۆڕشگێری راستەقینەو دادپەروەرێکی گەورەوە، دەڕواننە هاوکێشەکانی ناو حزبەکەیان، تەنانەت ئەوانەی لەترسان و لەبرسان نەیاندەوێرا هەڵوێست دەرببڕن، لەمەودوا لەبەر پەرۆشی بۆ یەکێتی، ئیتر
بێ هەڵوێست نابن و لێناگەڕێن یەکێتیەکەی مام جەلال و کاروانی شەهیدان و تێکۆشەرانی کۆڵنەدەر لەمە زیاتر هەڵبدێرێ. هەڵیشنادێرێ.. قەت هەڵنادێرێ.
مەلا بەختیار
1-11-2021
نەخۆشخانەی ڤیڤانتێس

وتاری زیاتر









كۆچی شیهاب عوسمان.. خەمێكی تر‬ مەلا بەختیار
2021-01-04 17:39      156 جار بینراوە


مام عەبدولخالق.. مێژووت هەیە ‬ مەلا بەختیار
2020-11-15 12:13      159 جار بینراوە



مام.. ئازادیت باش‬ مەلا بەختیار
2020-10-03 13:57      215 جار بینراوە


هات و نەهاتەكەی هاتنی كازمی‬ مەلا بەختیار
2020-09-12 21:05      173 جار بینراوە

عومەر شیرەمەڕیی كۆچت ناوەختە!‬ مەلا بەختیار
2020-09-08 14:56      221 جار بینراوە














نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو