ئایا دەکرێت دابەشکردنی پلەو پوستەکان بەشێوەیەکی پشک پشکێنەو تایفی بەدیموکراسی ناو بنرێت؟
ئەوەی لە عیراق و ناوچەکە دەگوزەرێت ئیدیعاکردنی دیموکراسییە وەنەک دیموکراسییەت، ئەنجامدانی ھەڵبژاردن لەسیستەمێکی جەقبەستوو بەواتای دیموکراسی نایەت، بەڵکو ئەمە بانگەشە کردنی دیموکراسییە، ٪‏٧٠ ی ئێستای پەرلەمان خۆیان کاندید کردووەو داوای متمانە لەھاووڵاتیان دەكەن، زۆربەی ئەوانەی خۆیان کاندید کردۆتەوە ئەندامی حزبە گەورەکانی عیراقن بەو ھۆیەشەوە شانسی بردنەوەیان زۆرە، پەرلەمانی عیراق لە ٣٢٩ ئەندام پێکدێت، زیاتر لە ١٠٠ ئەندامی ئەم خولی چوارەی پەرلەمان دوو خولە ئەندامی پەرلەمانن، ٢٠ ئەندام پەرلەمانی ئەم خولە لە دوو خولی پێشووتریش ئەندام بوون، واتا سێ خوولە ئەندامی پەرلەمانن، ١٦ ئەندام پەرلەمانی ئەم خولە پێشووتر وەزیر بوون لەکابینە جیاجیاکانی حکومەتدا، زیاتر لە٢٠ ئەندام پەرلەمانی ئەم خوولە پێشتر ئەندامی ئەنجومەنی پارێزگاکان بوون، ٤ ئەندام پەرلەمانی ئەم خوولە پێشووتر پارێزگار بوون، ئەوەی دەمەوێت ئاماژەی پێبدەم ئەوەیە کە عیراق لەنێو بازنەیەکی داخراودا دەسووڕێتەوەو باڵادەستەکانی ناو پارتە سیاسییەکان ئاڵوگۆڕ بەکورسییەکانیان دەکەن لەنێو ئەو بازنە داخراوەدا، راستە ھەموو ھەڵبژاردنێک کۆمەڵێک دەموچاوی نوێ پەیدا دەبن، بەڵام ئەوانەی نەخشەی سیاسی ئەم وڵاتە دادەڕێژن و رەسمی نەخشەڕێگا دەکەن خۆیان لەو بازنە داخراوەدا دەبیننەوە دووبارەو چەندبارە دەبنەوە.