سیاسەتكردن بۆ كوردستانێتی كەركوك بۆ قۆناغی داھاتوو چەند رەھەندێكی نوێ لەخۆدەگرێت. دیاریترینیان نەخشە رێگای ماددەی 140ی دەستورییە.بەڵام ھاوشانی ئەم نەخشەرێگایە سیاسەتی تریش پێویستە بۆ ئاساییكردنەوەی كەركوك.
ماددەی 140 هەم نەخشەرێگای دەستوورییە ‌و هەم دەسكەلایەكی رەوایە بەدەست كوردستانیانەوە، بەڵام ئەم ماددەیە پەینی تری پێویستە كە لەگەڵیا مۆتۆربە بكرێت.
بوژانەوەو گەشانەوەی دیموكراسیی دوای قۆناغێك لەپاشەكشێ پێكردنی، پەینێكی بەهێزە بۆ كوردستانێتی كەركوك . گەڕانەوە بۆ بنەماكانی فیدرالی كە لە دەستوردا هاتووە و ئێستا هەن هەڕەشەی لێ دەكەن، ئەویش پەرژینێكی قایمە بۆ كەركوكی ئایندە. ئەگەر میلیشیا ‌و باندی تایفەگەری، عەسكەرو عەنتەر لەبەغدا ‌و تەواوی عیراق لەشەقامی سیاسەت دوور بكەونەوەو بچنەوە سەنگەرەكانی پارێزگاری لەوڵات كەركوكیش لەبەر ئەم هەتاوی حوكمی مەدەنیەدا دەتوانێ هەناسەیەك بدا‌و هەوایەكی پاك هەڵمژێ. دوور لەحوكمی شۆڤێنی ‌و تایفەگەری ‌و نزیك لەحوكمێكی مەدەنی ‌و دیموكراتی، كەركوك دەتوانێ خۆی لە هەڕەشەی تەعریبی كۆن و نوێ بپارێزێ. 
ھەروەھا حوكمێكی دیموكراتی، مەدەنی دەستوریی كە شۆڤێنی و تایفەگەری تێیدا زاڵ نەبێت رێگە لەموزایەدەی گۆشەگیری نەتەوەیی ئەوانەش دەگرێ كەتەنھا قسەیان ھەیە بۆ كەركوك و قسەش ناچێتە گیرفانەوە.تەنھا بۆ خڕكردنەوەی دەنگ وەبیریان دێتەوە كەركوك دڵی كوردستانە.
ئەو هێزەی دەتوانێ پشت ‌و پەنا بێت بۆ دیموكراتخوازانی عیراق تەنها‌و تەنها هاوپەیمانی كوردستانە.
ھاوپەیمانی كوردستان باسكی بەھێزی داكۆكییە لەمافەكانی كەركوك لە بەغدا