فەتحوڵڵا حسێنی

هاوپەیمانیی ئۆپۆزسیۆنی عەرەبی سوریا دوا كارتی خۆی لەدەست دەدات

  2021-08-27 11:12      207 جار بینراوە        کۆمێنت

وا پێدەچێ ئەو هاوپەیمانییەی بە هێزی شۆڕشی سوریا ناودەبرێ، واتە هاوپەیمانی ئۆپۆزسیۆنی عەرەبی سوریا، لە بەرامبەر گەلی سوریادا دوا كارتی سەربازیی و سیاسی خۆی لە دەست دابێت، ئەویش بە سەردانەكەی ئەم دواییەی سەرۆكی هاوپەیمانییەكە بۆ لای سەركردەی گروپە (چەكدارە بەكرێگراوەكان) لە عەفرینی داگیركراو و پێشكەشكردنی (مەدالیای شەرەف) بە سەركردەی ئەو چەكدارانە، لەبەرئەوەی سەرپەرشتی گۆڕینی دیمۆگرافی ناوچەكە دەكات.

لە یەكەم كاردانەوەدا لەلایەن هاووڵاتیانی عەفرینەوە، هاووڵاتییەك لە فەیسبووكەكەی خۆی دژی ئەو هەنگاوەی هاوپەیمانی نووسیبووی: «مەدالیای شەرەف لەلایەن بێ شەرەفێكەوە پێشكەشی بەكرێگیراوێك دەكرێت». ئەمە وایكرد تەنانەت سایتی مەرسەدی سوری كە پێشتر هەواڵەكەی دابەزاندبوو، كاپشنی ژێر وێنەكەی گۆڕی بۆ (سەرۆكی هاوپەیمانی چاوی بە ئەبو عەمشە دەكەوێت)، بێ ئەوەی باس لەوە بكات بۆچی چاوی پێی كەوتووە و چی پێشكەش كردووە!.

دوای ئەوەی ئۆپۆزسیۆنی عەرەبی پێی گڵاوی نایە چەند ناوچەیەكی كوردی و عەرەبی خاكی سوریاوە و دوای ئەوەش كە توركیا‌ و گروپە چەكدارەكانی چەند شارێكی كوردی عەرەبی داگیركرد بە سەرپەرشتی و هاندانی راستەوخۆی هەمان هاوپەیمانی ئۆپۆزسیۆن، دوای ئەوەی یەك لەسەر سێی شارە گەورەكانی وەك حەڵەب و حەماو حومس شاری چوارەمیش كە ئیدلبە خەریكە وێران دەبێت، دوای ئەوەی یاری بە كارتی تایەفەگەریی كراو ئاوارە و راگوێزراوەكانیش بێ یارمەتی و هاوكاری مانەوە و توركیا و ئەو ئۆپۆزسیۆنەش هیچی بۆ نەكردن، گەلی سوریا ئێستا چاویان لە دەستی كۆمەڵی نێودەوڵەتییە تا كارێك بۆ چارەسەری قەیرانی سوریا بكەن، چونكە هیوایان بە ئۆپۆزسیۆن نەماوە و پاڵەوانەكانی ئۆپۆزسیۆن چاویان بڕیوەتە كورسی و دەسەڵات و هیچی دی، جگە لەوەی خۆشیان دەستیان لە قووڵبوونەوەی قیرانەكەدا هەبووە.

رەنگە ئێستا پلانێك لە ئارادا بێت بۆ دروستكردنی ئۆپۆزسیۆنێكی جیاواز، ئەویش دوای ئەوەی ئۆپۆزسیۆنی عەرەبی دوا كارتی خۆی لەدەست دا، ئێستا سێ مەیدانی دیكە دەركەوتوون بۆ قسەكردن لەسەر قەیرانەكە، مەیدانی مۆسكۆ، مەیدانی قاهیرە و مەیدانی ریاز، ئەنجومەنی دیموكراتی پڕۆژەیەكی پێشكەش كردووە بۆ كۆكۆدنەوەی ئەو هەوڵانە لە چوارچێوەیەكدا، ئەم هەنگاوەش دوای ئەوە دێت كە هەریەكە لە میسر و سعودیە و ئیمارات هاتنە دەنگ و دوای ئەوەش كە مۆسكۆ متمانەی بە ئەنقەرە نەما، دوای ئەوە دێت كە بەهۆی پلانەكانی توركیاوە سوریا بوو بە گۆڕەپانێكی كراوە بۆ وێرانبوون و مردن و راگواستن و گۆڕینی دیموگرافی بێ ئەوەی كۆمەڵی نێودەوڵەتیش متەقی لێوە بێت، پڕۆژەی كوردیش بە شێوەیەكی روون و ئاشكرا پشتیوانیی لێ ناكرێت، بەڵام من دڵنیام ئەم جارەیان چارەسەر دەدۆزرێتەوە بە ئامادەبوونی كورد و دوور لە خواستی توركیا.

دوای درێژەكیشانی ئەم قەیرانە كوشندەیە، هیچ رێگەیەك نەماوە جگە لەوەی بە چاوی نیشتمانییەوە بڕوانینە كارەساتەكە و لەوەش تێبگەین كە دۆخەكە پێویستی بە چارەسەری بەپەلە هەیە، چونكە بەهۆی كردەوەكانی توركیاوە كە دەیان هەزار چەكداری بەكرێ گرتووە و ناویشی لێناون شۆڕشگێڕ و بەڕێیان دەكات بۆ شارەكانی سوریا و لەوێش بە هەماهەنگی لەگەڵ پاشماوەی گروپە تیرۆریستەكان چییان بوێت ئەوە دەكەن و تەنانەت گێچەڵ بە وڵاتانی دراوسێش دەكەن و كۆمەڵی نێودەوڵەتیش هیچ ناڵێت.

جیهان بە گشتی لەسەر دەستی تیرۆری داعش و ئەلقاعیدە زیانی پێ گەیشتووە، بەڵام تائێستاش رێگەچارەیەك بۆ بنبڕكردنی تیرۆر دانەنراوە، هەنگاوی یەكەمیش بۆ چارەسەری سیاسی نەنراوە، ئەوەش لەكاتێكدایە ئۆپۆزسیۆنی عەرەبی لەبەر یەك هەڵدەوەشێ و كوردیش تا ئێستا یەكگرتوو نییە، ئەگەرچی كۆڵەكەی سەرەكی ئەنجومەنی سوریای دیموكرات و هێزەكانی سوریای دیموكراتە و ناوچەكانی ژێر دەستیشیان دەبێتە بناغە بۆ هەنگاوی سەرەتا، بەڵام ئەوە كاتێك دەتوانرێت ئەو هەنگاوە بنرێت كە كۆمەڵی نێودەوڵەتی بتوانێت كۆتایی بە ئەجێنداكانی ئەنقەرە سەبارەت بە سوریا بهێنێت.

مەیدانەكان زۆرن، ئۆپۆزسیۆن پەرش و بڵاوە و بە دوای پارەوەیە، جوگرافیایەكی ئارام هەیە، بەردەوام وڵاتانی دراوسێ هەڕەشەی لێ دەكەن، رژێمێك هەیە کە هیچ دەستپێشخەرییەكی پێ نییە، دوای ئەم هەموو وێرانییە، ئەگەر هیوایەك هەبێت دەبێ لای كۆمەڵی نێودەوڵەتی بێت، دەبێ كۆمەڵی نێودەوڵەتی واقیعێكی نوێ بسەپێنێت بەسەر سەرجەم لایەنەكاندا و كۆتایی بەم كارەساتانە بهێنێت کە بەسەر سوریادا دێن.

وتاری زیاتر


















كوردی رۆژاڤا لەكۆشكی ئەلیزێ‬ فەتحوڵڵا حسێنی
2021-08-12 12:17      456 جار بینراوە













نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو