گوێ نەگرتن لە رای خەڵك، بەتایبەتی شارەزایان ‌و پسپۆڕانی هونەریی ‌و دەروونی ‌و زمانەوانی لە زۆرێك لە كەناڵە میدیاییە كوردییەكاندا گەیشتۆتە ئاستێك كە ئەگەر ستەمیان لێ نەكەین، دەتوانین بڵێین لەجیاتی گەشەپێیدان بە سەلیقەی هونەریی، لە ئەنقەست سەلیقەی هونەریی بینەران دەشێوێنن.

ئەگەرچی ئێستا جیاواز لەجاران لەجیاتی ئەوەی كەناڵێك هەبێت كە تێكەڵە بێت لە هەواڵ ‌و سیاسەت، هونەر ‌و رووناكبیریی ‌و هەمەڕەنگ، وەرزش، بەرنامەی منداڵان، بەرنامەی ئایینی، زانستی و پەروەردەیی و…هتد، لە هەموو یەكێك لەو بوارانەدا بە تەلەفزیۆنی لۆكاڵی ‌و ئاسمانییەوە چەندین كەناڵ هەن، بەڵام گرفتەكە لەوەدایە بەرنامەكان بەتایبەتی لە كەناڵە هونەری ‌و هەمەڕەنگەكان كۆپیی یەكترین، زۆرترین گۆرانیی ناخۆش ‌و بێ چێژی هونەریی، زۆرترین درامای بێ كەڵك ‌و بێ ناوەڕۆك ‌و وێكچوو كە زۆربەیان نەك هیچ پەیامێكی پەروەردەیی، رووناكبیریی و كۆمەڵایەتیی باشیان لەپشتەوە نییە، بەڵكو تەواو پێچەوانەی ئەو چەمكانەن، لە هەمووشی خراپتر ئەو گوێ نەگرتنەی بەڕێوەبەران ‌و سەرپەرشتیارانی ئەو كەناڵانەیە لە هونەرمەندان ‌و ئەوانەی كە سەلیقەی هونەرییان هەیە لە كۆی بوارەكاندا، كە ئەمە هونەرێكی نوێیە ‌و پێی دەوترێت هونەری گوێنەگرتن ‌و فەرامۆشكردنی رای ئەهلی مەسەلەكە، كە ئەوەش دواجار جگە لەوەی بە زیان بۆ پێشكەوتنی كۆمەڵگە دەكەوێتەوە، خودی ئەو كەناڵانەش بێ ئەرزش دەكات، دیارە پێداچوونەوەی ئەو دۆخە هونەریی ‌و رووناكبیرییەش بەرلە هەمووان ئەركی وەزارەتی رۆشنبیریی ‌و لیژنەی رۆشنبیریی پەرلەمانە كە بە رێنمایی ‌و یاسای جۆراوجۆر ‌و دانانی سزا و غەرامە بەر بەو شێوازە میدیایە بگرن كە بەناوی «میدیای كەسی ‌و تایبەتی!»ەوە رەوشی رووناكبیریی ‌و هونەریی كۆمەڵگەی كوردستان بە ئاقارێكی خراپدا دەبەن.