ئیدارەی خۆجێیی باكوور و خۆرهەڵاتی سوریا پێشوازیی لە داواكارییەكی روسیا كرد بۆ دەستپێكردنی گفتوگۆی گشتگیر و هەمەلایەنە لەگەڵ رژێمی سوریادا، گفتوگۆیەک كە كورد دەتوانێت مەرجی بۆ دابنێت، ئیدارەی خۆجێیی لە بەیاننامەیەكدا وێڕای پێشوازی لە داواكارییەكە جەختیشی كردەوە كە پێویستە ئیدارەی خۆجێیی وەك قەوارەیەكی سەركەوتوو بمێنێتەوە، لەم سەروبەندەدا توركیا بەپەلە داوای كۆبوونەوەی 16هەمینی ئاستانەی كرد، ئەوەش لە كاتێكدایە كە توركیا خۆی لەسەر ئاستی نێودەوڵەتی باری لارە و گڵۆڵەی لە لێژییە، بە تایبەت دوای ئەوەی هەموو گوشارێكی بەكارهێنا بۆ ئەوەی روسیا كارێكی وا بكات تا شەڕی ئیدلب بە قازانجی ئەنكەرە بكەوێتەوە نەك دیمەشق، بەڵام هەوڵەكانی بێسوودبوون، ئەگەرچی پێشتریش لە كۆنگرەی ئاستانە توركیا و ئێران و روسیا لەسەر ئەوە كۆك بوون، بەڵام روسیا جێبەجێی نەكرد.

لەلایەكی دیكەوە ئەمریكا سوورە لەسەر ئەوەی رێگە بدرێت یارمەتی مرۆیی لە دەروازەی سنووریی (ئەلیەعروبیە)ی نێوان عیراق و سوریاوە بگاتە دەست خەڵكی سوریا، هەڵبەت بە ئاگاداریی كۆمەڵی نێودەوڵەتی، بەڵام روسیا هەرجارێك باس لەو بابەتە كرابێت، مافی ڤیتۆی بەكارهێناوە بۆ رێگرتن لەو پڕۆسەیە، پێدەچێ ئەم جارەیان روسیا خۆی لێ بدزێتەوە، ئەم هەڵوێستەی روسیا دوای دەرەنجام و دەرهاویشتەكانی كۆنگرەی 16هەمی ئاستانە دێت، پێدەچێ دەرهاویشتەكانی كۆنگرەی 16هەمی ئاستانە قورساییەكی گەورە لەسەر شانی توركیا دروست بكات، ئەو توركیایەی بە زەبری هێز خۆی لە دۆسێی سوریا هەڵقورتاند و زیانەكانی ئەو كارەیشی لەسەر ئاستی ناوخۆیی و نێودەوڵەتی رۆژ بە رۆژ زیاتر دەردەكەوێت.

بارودۆخی ئێستای نێودەوڵەتی وا دەخوازێ هەموو ئەوانەی خۆیان لە كاروباری سوریا هەڵقورتاندووە هەڵوێستی جددی وەربگرن بەرامبەر بە قەیرانی سوریا كە هەر لەسەرەتاوە و تا ئێستاش قەیرانێكی ئاڵۆزبووە، دۆخەكان زوو زوو دەگۆڕێن، گروپی تازە دروست دەبن، هەندێك گروپ نامێنن و هەڵدەوەشێنەوە، گروپی چەكداری جۆراوجۆر لایەنی دەرەكی دەگرن و زوو زووش ئاراستەكەیان دەگۆڕن، لە رووی سەربازیی و سیاسیشەوە ناو بەناو دۆخەكە دەگۆڕێت، ئەوجا یان بە چاك یان بەخراپ، لەبەرئەوە پێویستە كۆمەڵی نێودەوڵەتی بە گیانی بەرپرسیارییەوە ئەركی خۆی بەرامبەر بە قەیرانی سوریا جێبەجێ بكات، ئەو قەیرانەی رۆژ بە رۆژ خراپتر دەبێت ئەگەر هێزە نێودەوڵەتییەكان بە تایبەت ئەمریكا و روسیا خۆیانی لێ بدزنەوە، بەڵام ئەگەری هەیە ئەمجارە ئەو لایەنە نێودەوڵەتییانە بگەنە رێكەوتن، ئەویش دوای یاخیبوون و لەخۆبایی بوونی توركیا لە رووی سیاسی و سەربازییەوە، نەك هەر لە سوریادا بەڵكو لەسەر ئاستی هەموو جیهان کە بەشێوەیەکی نەشیاو رەفتار دەكات.

لەماوەی ساڵانی رابردوودا، وەفدی سیاسی ئیدارەی خۆجێیی چەندان جار سەردانی مۆسكۆی كردووە و لەگەڵ بەرپرسانی روسیا كۆبۆتەوە، لەو سەردانانەدا مۆسكۆ وای پیشان دەدا كە پڕۆژەی كوردی پێ باشە بە تایبەت ئەگەر بە سازان لەگەڵ رژێمی سوریادا بێت، وەفدەكە داواشیان كردووە كە روسیا ببێتە ناوبژیوان لە نێوان كورد و رژێمی ئەسەددا، بەڵام ئەوەی بۆ قووت نەدەچوو، روسیاش وەك پێویست گوشاری نەدەخستە سەری، ئەمەش وای كرد رژێم بە لەخۆباییبوونەوە پڕۆژەی كورد رەت بكاتەوە، تاكە مەرجی كوردیش بۆ گفتوگۆ تەنیا مانەوەی ئیدارەی خۆجێیی بووە.

لە راستیدا گفتوگۆی نێوان كورد و رژێم سەركەوتوو دەبێت ئەگەر ئەم سێ مەرجە سەرەكییەی تێدا بێت: یەكەم ئەگەر رژێم دان بنێت بەوەدا كە توانای پارێزگاریی لە خاكی خۆی نییە لەبەردەم هێرشی گروپە چەكدارەكانی سەر بە توركیادا. دووەم، ئەگەر مۆسكۆ سەرپەرشتی گفتوگۆكان بكات و كاری جددی بۆ بكات و دانیش بەوەدا بنرێت كە پڕۆژەی كورد لە خزمەتی یەكێتی خاكی سوریادایە. سێیەم دەبێ وا سەیری پڕۆژەی كورد بكرێت كە جۆرێكە لە حوكمی زاتی نەك جیابوونەوە، هەروەها كورد و هاوبەشەكانیان بەرگرییان لە ناوچەكانی خۆیان كردووە و سوریایان لە چنگی دڕندەیەكی وەك تیرۆر پاراستووە، ئەوەش لە كاتێكدایە كە رژێم خۆی نەیتوانیووە سوریا لە تیرۆر بپارێزێت.