شوان كەریم كابان

رێزگرتنی یەكێتی نیشتمانیی كوردستان لەبەرامبەر

  2020-12-18 21:56      237 جار بینراوە        کۆمێنت

(ی.ن.ك) پاش رووداوەكانی كارەساتی هەكاری و پاش هەنگاو بەهەنگاو خۆڕێكخستنەوە، هەندێ بارەگای لەسنووری گوندی شێنێی سەر بەشاری قەڵادزێ دانا، لە زەڵێ، لەتووژەڵە كە لەسەر سنوورە، پێشتریش لەنۆكان كە لەبەری كوردستانی رۆژهەڵاتە. سەرەنجام بارەگای سكرتارییەت و ماڵی سەرۆل مام جەلال و بارەگای كاك نەوشیروان و مەكتەبی عەسكەری و راگەیاندن و ئیدارەو ناوەندی كۆمەڵەو شۆرشگێڕان و چەند بارەگایەكی تر لەو سنوورەو بڵاوببوونەوە. دوو رێگا هەبوو بۆ هاتوچۆ بۆ سەركردایەتی، رێگایەكیان  لەشێنێ بۆ سونێ و لەوێوە یا بۆ قەڵاتوكان و بناری قەندیل بۆ سنووری مەڵبەندی سێی ئەوسا، یا لەسونێ-وە بۆ دەوروبەری قەڵادزێ، یاخود بەلای هەڵشۆو بەرەو خوارتر. رێگاكەی تر دەبوو بەناوچە رزگاركراوەكانی ئەوسای كوردستانی ئێران، رۆژهەڵات كە لە كانی زەردەوە دەستی پێدەكرد بۆ بەنو خەڵەف، ئەمجا بێوران، ئەمجا قەلەڕەشە، لەوێوە بۆ هەورازی سەختی ئەسپە نێزە، ئەمجا یان بەشاخی زەردكەدا شۆردەبوویتەوە بۆ بێتوش و لەوێوە دەتتوانی بپەڕیتەوە بۆ بەری شارباژێر لەكوردستانی باشوور، یاخود درێژەت بەڕێگا دەدا بۆ بێژوێ و لەوێوە بۆ گوندی گەرماو بەچیای سوركێودا بۆ دیوی شارباژێڕ، یاخود بۆ گوندی بلەكێ و لەوێوە بەلای چەمپاراودا بەچیای سورباندا هەڵدەگەڕای بۆ شارباژێر شۆڕدەبوویتەوە.
رێگای دووەم هەموو گوندو ناوچەكانی لەژێر دەستی پێشمەرگەكانی حیزبی دیموكراتی ئێران و كۆمەڵەی زەحمەتكێشانی كوردستانی ئێران و سازمانی خەبات بوو. ئەم رێگایە رێگایەكی باش و سەلامەت بوو بۆ هاتوچۆی پێشمەرگەو كادیرەكانی یەكێتی بەتایبەت هەرێمی یەك  و پێنج كە دواتر بوون بەمەڵبەندەكانی یەك و دوو. ئەم هاتوچۆیە هەروا هەڕەمەكی نەبوو، بەڵكو یەكێتی بۆ رێزگرتن لەبوون و فەرمانڕەوایی ئەو حیزبانە، گەر چی دۆستایەتییەكی توندوتۆڵ دەیبەستنەوە، لەگەڵیان رێكەوتبوو، كە پێشمەرگەو كادیرو هێزەكانی یەكێتی، بەپسوڵەو وەرەقەو بەڵگەنامەو بەئاگاداری ئەوان بەو رێگایانەدا هاتوچۆ دەكەن تاكو هیچ كەسێك خراپ سوود لەو دۆستایەتی و پەیوەندییە وەرنەگرێت. بۆیە هیچ پێشمەرگەو كادیرو هێزێكی یەكێتی بێ بەڵگەو وەرەقە هاتوچۆیان نەدەكرد،  بەپێچەوانەوە رێگرییان لێ دەكراو تووشی لێپرسینەوە دەبوون. 
جارێكیان هونەرمەندی شێوەكارو گەورەی كورد مەدحەت كاكەیی، لەڕێی هاتن بۆ سەركردایەتی، نزیك بێژوێ لا ئەدات بۆ كێشانی وێنەی خانوویەك كە بە هزری ئەو بۆ كێشان زۆر شیاو جوان بووە، دەستدەكات بەوێنەكێشان، ژمارەیەك پێشمەرگە لێ نزیك دەبنەوەو لێ دەپرسن؛ چی دەكەی؛ دەڵێ؛ وێنەی ئەو خانووە دەكێشم، دەڵێن ئەزانی ئەو خانوە چییە؟ دەڵێ نەوەڵا، دەڵێن ؛ ئەوە بارەگای دەفتەری سیاسی حیزبی دیموكراتی كوردستانی ئێرانە، مەدحەت كاكەییش دەڵێ؛ ببورن نەمزانیوە، من پێشمەرگەی یەكێتیم، پێی دەڵێن ؛ هیچ بەلگەیەكت پێیە ئەوە بسەلمێنێ؟ دەڵێ؛ نەوەڵا، ئەوانیش پێی دەڵین؛ بەداوای لێبوردنەوە ئەبێ میوانی ئێمە بی تاپرسیار لەبرایانی یەكێتی دەكەین دەربارەی بەڕێزتان. هەڤاڵانی حیزبی دیموكرات لەڕێی جیهازی بێ تەلەوە لەبارەی كاكەییەوە پرسیار لەمەكتەب عسكەری یەكێتی دەكەن و وەڵامی مەكتەب عەسكەری دڵییاییان دەداتێ كە بەڵێ پێشمەرگەی ئێمەیەو ئەوانیش بەڕێزەوە بەڕێی دەكەن. 
سەفەرێكێش سەرۆك مامجەلال بەمەبەستی كۆبوونەوە لەگەڵ شەهید قاسملۆ لەسەركردایەتییەوە لەگەڵ چەند هەڤاڵێكی تر بەڕێ دەكەوێ، لە بەنو خەڵەف سەیتەرەیەكی هەڤاڵانی حیزبی دیموكراتی كوردستانی لێ دەبێ ، ئەوسا پێشمەرگەیەكی لێ بوو ناوی سورەیان لێ نابوو. كاتێك مام دەگاتە ئەوێ، داوای وەرەقەی لێ ئەكات، مام دەڵێ من مام جەلالم، ئەویش ئەڵێ، جا قەیچێكە، بەس هەر ئەبێ وەرەقەت پێ بێ، سەرۆك مامجەلال-یش لەسەر كورسی چایخانەكەی بەنو خەڵەف دادەنیشێ و وەرەقەیەك بۆ خۆی دەنووسێ و ئیمزای دەكاو مۆرێكیشی لێ ئەدا و ئەیدا بە سوورە، ئەویش دەڵێ ؛ ئیستا تەواوە، دەفەرموو بڕۆ. شەهید قاسملۆ بەم رووداوە دەزانێ، بڕیار ئەدا پێشمەرگەكە لەو شوێنە لابات و سەرنجی راكێشێ، سەرۆك مام جەلال پێ دەزانێ و داوا لەشەهید قاسملۆ دەكات كە هیچی لێ نەكات و ئەو چاكی كردووەو ئەركی خۆی جێبەجێكردووە. 
لەپاش ساڵی ١٩٨٣، بەشێك لەبارەگاكانی حیزبی دیموكراتی كوردستانی ئێران هاتبوونە سنووری سەنگەسەر لە سورەدێ و دەوروبەری. یەكێتی نیشتمانی بڕیاری دابوو لەو سنوورە چالاكی سەربازی نەكات تاكو پێشمەرگەكانی حیزب تووشی كێشە نەبن!. 
ئەمانە چەند نموونەیەكی كەمن لەڕێزگرتنی یەكێتی لەویست و ئیرادەو كەسێتی حیزبە دۆست و هاوپەیمانەكانی.

 

وتاری زیاتر

عیراق وڵاتی ئینقیلاب!‬ شوان كەریم كابان
2022-08-30 20:54      118 جار بینراوە

شیمال ئەلعیراق‬ شوان كەریم كابان
2022-08-02 21:59      90 جار بینراوە


بەهیوای دیدار‬ شوان كەریم كابان
2022-06-05 10:14      65 جار بینراوە







راستییەکان ناشاردرێنەوە‬ شوان كەریم كابان
2022-03-12 13:45      127 جار بینراوە



رەوتی سەدر چی دەوێ؟‬ شوان كەریم كابان
2022-02-22 18:57      114 جار بینراوە

ئاسایش بۆ کێ؟‬ شوان كەریم كابان
2022-02-20 16:54      103 جار بینراوە

سلێمانی نزیکترە یان نەجەف؟‬ شوان كەریم كابان
2022-02-05 20:14      108 جار بینراوە

ئاواتەکەی شەھد‬ شوان كەریم كابان
2022-01-08 16:35      120 جار بینراوە


وەرزش وسیاسەت‬ شوان كەریم كابان
2021-12-21 15:14      160 جار بینراوە

میدیای سەدەی بیست و یەک‬ شوان كەریم كابان
2021-12-19 17:32      150 جار بینراوە



نامرن ئەوانە‬ شوان كەریم كابان
2021-11-21 23:07      118 جار بینراوە




هەڵبژاردن وگومانەكان!‬ شوان كەریم كابان
2021-10-21 22:09      105 جار بینراوە




نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو