ئەو راگەیاندنانەی سوریا كە سەر بەحزبی بەعسی سوریان، تۆمەتەكانی وەلید ئەلموعەلیمی وەزیری دەرەوەی سوریایان بۆ ئیدارەی خۆجێیی كورد بە (ضربة المعلم ) وەكو عەرەب دەێڵێت وەسفكرد. كە لە فۆلكلۆری سوریاشدا بۆ ئەو جۆرە لێدانە بەكاردەهێنرێـت كە راستەخۆ گۆڵی بەرامبەر دەكاتە ئامانج‌و خاڵێكیش بۆ یاریزانەكە تۆمار دەكات.
وەزیری دەرەوەی سوریا لەوتارەكەی ئەم دواییەیدا لەنەتەوە یەكگرتووەكان كوردی بەجوداییخواز ناوبرد، ئەمەش تۆمەتێكی كۆن‌و نوێیە لەلایەن بەرپرسانی سوریاوە، لەهەمان كاتدا هێزەكانی سوریای دیموكراتی بەوە تۆمەتباركرد كە میلیشیای جوداخوازن‌و پیلانگێری دژی یەكێتی خاكی سوریا دەكەن.
ئەوەی كەراگەیاندنی سوریا‌و سەرۆكی دیپلۆماتەكانی سوریاش ئاماژەیان پێ نەدا، ئەوەبوو كە هێزەكانی سوریای دیوكرات شاری رەقەیان لەدەستی داعشی تیرۆریست رزگاركردووە، ئەو شارەی كەپایتەختی دەوڵەتی بەناو ئیسلامی بوو، هەمان ئەو هێزانەش داعشی لەدوابارەگای خۆی لەباغۆز لەناوبرد كە لەدەوروبەری دێرەزوربوو، هەر ئەو هێزانەش ئارامیی بەشێكی فراوان لەخاكی سوریای پاراستووە، كەهێزەكانی (موعەلیم) نەیوێراوە نزیكی بكەوێت لەترسی داعش‌و گروپە تیرۆریستییەكانی دیكە، ئەو پرۆژەیەش كە ئەو هێزانە پشتیوانی لێدەكەن، پڕۆژەیەكی سیاسییە كە یەكێتی گەل‌و یەكپارچەیی خاكی سوریا دەپارێزێت، لەبەر ئەوەی بانگەشە بۆ تاك حزبی‌و تاك سەركردەیی ناكات وەك ئەوەی حزبەكەی موعەلیم‌و رژێمەكەی دەیكات، ئەو رژێمەی دەستی بەخوێنی هاووڵاتیانی خۆی سوورە.
هەوڵی چاوبەست كردنی رای گشتی‌و خۆگێل كردن لەراستییەكان لەلایەن وەلید موعەلیمەوە، چاونووقاندنە لەئاست ئەو سەركەوتنانەی لەباكووری سوریا دوور لەتایەفەگەری‌و مەزهەبچێتی بەدەستهاتووە، دوور لەو ئاژاوەیەی رژێم‌و ئۆپۆزسیۆنی عەرەبی بەرپایان كردووە، ئەو ناوچەیەی بەدەست هێزەكانی سوریای دیموكراتەوەیە بۆتە جێگەی سەرنجی هەموو جیهان، لەكاتێكدا ناوچەكانی ژێر دەسەڵاتی ئۆپۆزسیۆن بۆتە پاشكۆی توركیا، ئەو تۆمەتانەش هیچ نین جگە لەهەوڵێك بۆ داپۆشین‌و شاردنەوەی ئەو ئاژاوەیەیە كە رژێم دەیەوێ لەو ناوچانە بەرپای بكات كە لەسەر دەستی خەڵكی باكوور‌و خۆرهەڵاتی سوریا لەدەستی داعش رزگاركراون.
باشتر وابوو وەزیری دەرەوەی سوریا لەوتەكەیدا جەخت لەسەر تاوانەكانی ئەو گروپە تیرۆریستیانە بكاتەوە كە لەعەفرین‌و سەرێ كانی گرێ سپی‌و ئیدلب‌و جەرابلوس ئەنجامیان داوە، ئەو گروپانەی كە ناوچەكانی ریفی دیمەشق‌و حەڵەب‌و حومس‌و حەمایان وێرانكرد، دەیتوانی دەستپێشخەرییەكی سیاسی باس بكات كە وڵات لەو زەلكاوی ئاژاوەیە رزگاربكات‌و بیگەڕێنێتەوە بۆ سەر پڕۆژەی نیشتمانی كە پێشنیازی هێزەكانی سوریای دیموكرات‌و ئەنجومەنی سوریای دیموكراتە، دەبوو لەوە تێ بگات كە پڕۆژەی ئیدارەی خۆجێیی كە شەش ساڵە سەرپێ كەوتووە‌و لەناوچەكانی دەسەڵاتیدا بوژانەوە هەیە، پڕۆژەیەكە لەسەر پاشماوەی جەنگی ناوخۆ ناژی، ئەو جەنگە ماڵوێرانكەرەی كە خودی موعەلیم بەشێكی سەرەكییە تیایدا.
ئەقڵیەتی بێبەش كردن كە رژێم كاری پێ دەكات، دوای ئەو هەموو ساڵە لەوێرانكاری‌و جەنگە درێژخایەنە بەسەرچووە، پێویستە بەرپرسانی دیمەشق بەدوای چارەسەری سیاسیدا بگەڕێن نەك تەپڵی جەنگ لێ بدەن، پێویستە دەستپێشخەرییەكی سیاسی پێشكەش بكەن، یان دەستپێشخەرییەكەی ئەنجومەنی سوریای دیموكرات قبوڵ بكەن‌و لەسەر مێزی گفتوگۆ دابنیشن لەپێناو گەیشتن بەچارەسەری سیاسیدا، نەك دوای قسەی توركیا‌و روسیا بكەوێت، وەك ئەوەی ئۆپۆزسیۆن‌و رژێم كردوویانە.
تۆمەتەكانی وەلید ئەلموعەلیم سەرلەبەری رەتدەكرێتەوە، لەبەر ئەوەی لەدەسەڵاتێكەوە سەرچاوەی گرتووە كە جگە لەخۆی دان بەكەسی دیكەدا نانێت، هەر ئەو تاكڕەوییەش بوو كە وڵاتی گەیاندووە بەلوتكەی ئاژاوە، سنوورەكانیشی كردۆتە بەرووی گروپە تیرۆریستەكاندا كە بە ناوی جیاجیاوە شەڕیان هێناوەتە ناو شارەكانی سوریاوە، هەر ئەو تۆمەتانەن كە قەیرانی سوریایان كردۆتە قەیرانێكی درێژخایەن‌و وای كردووە چارەنووسی وڵات نادیار بێت، لەبری ئەوەی بەرەو چارەسەری سیاسی هەنگاوبنێن، ئەو چارەسەرەی خەمخۆرانی وڵات لەدەرعاوە تا قامیشلو بانگەشەی بۆ دەكەن، بەڵام ئەوان لەوبەرەوە ئەوان كەسانێك هەن تەپڵی شەڕی ناوخۆ لێ دەدەن‌و دەبنە هۆی قوڵبوونەوەی قەیرانەكە‌و سەرەنجامیش گەلی سوریا باجە گەورەكە دەدات.